Хкягъай эсеррин, повестринни гьикаяйрин и кIва­тIал Нажмудин Шихнабиева вичин уьмуьрда гьазурна акъудай ктабрикай виридалайни чIехиди ва, гьайиф хьи, эхиримжиди хьана: республикадин ктабрин издательствода «Уьмуьрдин декьикьаяр» кIва­тIалдин тираж гьазур жедалди яшлу писатель, азарлу яз, рагьметдиз фена…

Нажмудин Шихнабиев 1947-йисуз СтIал Сулейма­нан райондин Асалдхуьре­ ди­дедиз хьана. Адан йис жедалди, Ватан­дин ЧIехи дяведай хтай буба Кьади­ сагъ тахьай хирерикди рагьметдиз фена. Дидеди хва вичихъ галаз къуншидаллай Шихидхуьруьз бубадин кIвализ хутахна. Ина ам чIехи хьана, ина ада вири вичин уьмуьр­ни тухвана. Школа куьтягьай Нажмудин­ Шихнабиева ДГУ-дин филологиядин факультетда кIелна. Армиядин жергейра­ къул­лугъна хтана 1971-1972-йисара рай­он­дин «Коммунизмдин гатфар» газетдин редакцияда кIвалахна. 1972-1978-йисара – Испикрин юкьван школада, 2021-йисалди Шихидхуьруьн юкьван школада муаллим яз кIвалахна, ам пенсиядиз экъечIна.

Университетда кIелдай йисара Нажмудин Ших­набиева шиирар ва юмо­рескаяр­ кхьиз эгечIна. 1974-йисуз адан сад лагьай «Виш манатдин савда» гьикая «Коммунист» газетдиз акъатна. Гьанлай кьулухъ адан гьикаяярни повестар мукьвал-мукьвал газетринни журналрин чинриз акъатиз хьана.

КIелзавайбуру хушдиз­ кьабулай Н. Шихнабиеван эвелимжи «Куьредин билбил» ктабдиз 1978-йисуз дуьнья акуна. Гуьгъуьнин йисара «Мехъер», «Уьмуьрдин декьикьаяр», «Куьреда аламатар», 2017-йисуз­ «Хкягъай эсерар» кIватIаларни акъатна. Адан яратмишунра кьетIен чка кьилди ктаб яз чапнавай тарихдин «Большевик» повестди кьунва. И эсердин кьилин игит Къазимегьамед Агъасиевахъ галаз санал революциядин гьерекатра иштиракай шихидхуьруьнви Абдулбари Къазанбегов я.

Поэзиядихъайни Н. Шихнабиев уьмуьрда къакъатнач, 2021-йисуз ада гьар жуьре йисара кхьей шииррикай хкягъайбурун «Зун рикI я…» кIватIал акъудна, гуьгъуьналлаз шииррин «Шаирдин рикI» ва урус чIалал «Зов души» кIватIаларни пайда хьана. Адан яратмишунра вичи кIватIай халкьдин агъзурдалай виниз манийрин «Халкьдин руьгьдин гевгьерар» кIватIалдини важиблу чка кьазва.

«Уьмуьрдин декьикьаяр» ктабда писателди вичин яратмишунрин рекье, сифте кьилелай эгечIна, лап эхиримжи вахтаралди кхьей эсеррикай хкягъайбур гьатнава. Абурукай бязибур чи газетдин сайтда кIелиз жеда.

Гь. Чандаров