Ша, ЦIийи йис

Агь, ЦIийи йис, пагь, ЦIийи йис,

Вун атунал  шад я михьиз,

Руьгь гьазур я вун кьабулиз,

Умудар гузвай рикIериз.

Дегиш туштIан чи календарь,

Амач къе вахъ куьгьне гьунар.

Вахъни хьана зурба вахтар

Кьилиз тухвай чIехи крар.

Гьикьван лагьайтIани гафар,

Вун галачиз къведач гатфар.

Лугьун за квез, валлагь, дустар,

Шад кар я им атун сувар.

Вун кьабулзава гьар жуьре,

Ихьтинбур я вахтарни къе.

Ислягьвал хьуй гьар са кIвале,

Шадвал хьурай гьардан рикIе.

Чи ватандин четин макъам

Алахънава тергиз душман.

Ша, ЦIийи йис, ша, ЦIийи йис,

Мад чаз хабар тахьурай пис.

Ислягьвал хьуй, садвал хьурай,

Мехъер-межлис, шадвал хьурай!

Чи умудар кьиле тухуз,

ЦIийи йис, вахъ паквал хьурай!

"Лезги газетдин" 2023-йисан 1-нумрадай.

_______________________________________

Акъвазнава чи Шарвили!

КIелед хивез хкаж жезвай
МискIинд патав гвай гурара
Акъвазнава чи Шарвили
АкIурна тур вацIун рага.

Гъалибвилин тур гъилеваз,
Маяк хьиз акъвазнава вун,
Шалбуз дагъдин нур пелеваз,
Хуьзва дере Самур вацIун.

Лезги чилин даях я вун,
Лезгистандин дамах я вун,
Чи несилрик руьгь кутазвай
Гьамишалугъ пайдах я вун.

 
ЧIал ава чаз, ава Ватан

ЧIал ава чаз, ава Ватан,
ЧIал ава чаз, чун я кьакьан.
Дидедин чIал хуьзвай инсан
Са чIавузни жедач аскIан.

Гьинаг кьисмет хьайтIани чаз,
Дидед чIал хьуй мецел алаз.
Чи дидейрин ширин лай-лай
Ракъур тийин чна рикIелай.