Бренбег Абдуллаев (Мискискарин хуьр)
«Заз уьмуьрди эверзава датIана…»
Абдуллаев Бренбег Шевкетович 1961-йисуз Докъузпара райондин Мискискарин хуьре дидедиз хьана. Хуьруьн школадилай кьулухъ ада Махачкъалада культурадин колледжда кIелна, Советрин Армияда къуллугъна. 1985-йисалай ам хайи хуьре культурадин кIвалин директор, «Дагъустандин культурадин лайихлу къуллугъчи» тIварцIин сагьиб я. Адан поэзиядин эсерар газетризни журналриз акъатзава. «Зи рикIин рехъ» ва «Дагъларин накъвар» кIватIалрин автор тир адан «Ватандин чим» ктабдиз и мукьвара дуьнья акуна._______________________
Хабар кьуртIа гъейрида
Кьисмет хьана, хабар кьуртIа гъейрида,
Вун гьинай я, гьи нугъатдин иес я?
Лугьуда за рикI ачухна хуруда,
Зун Алпандин чIехи халкьдин мирес я.
Лигимбур я атIуз кьакьан рекьерни,
Шиш синервай илгьам къачур рикI авай,
Цавун аршдай рахазва чав лекьерни,
Салам гана, жузазва, куьн гьикI ава?
Ана къанун язва багьа адетар,
Тербиячи ирс я анжах бубадин.
Стхаяр я ана вири миллетар,
Ялавлу рикI кузвай йикъахъ пакадин.
Эгер мугьман дуьшуьш хьайтIа къарши ваз,
Гъил вугуда, салам гунин лишан тир.
Четин юкъуз панагь жеда къунши ваз,
Яргъал алай мукьвадлайни хъсан тир.
Дарих юкъуз сурал фида дидедин,
Хиялрикай пайда жуван багъридиз.
Икрам авур шартIариз пак кьибледин
Чанни уьмуьр хизан патал гайидаз.
Ана раган чинай агъуз сачахар
Авахьзава абукевсер чарчардин.
Къадим хуьруь гузма вичин дамахар
Тик цлара гьунар амай устIардин.
Дагъларилай авач багьа ватан заз,
Гьар камуна аватIан бул зегьметар.
Пара ятIан агъузайбур гардан чаз,
Уьтквембур я анжах ийиз гьуьрметар.
Дагълара хуьр, дагълара заз кIвал ава,
Гуя йифиз варз ава ви къужахда.
Заз девлетар ватан, миллет, чIал ава,
Лезги лагьай багьа-багьа тIварцIел дамахда.
Зун вуж ятIа, хабар кьуртIа гъейрида,
Лугьуда за руьгь ялавлу кефи я,
Кьил хкажна, рикI ачухна хуруда,
Пак дагълари илгьам гайи дагъви я.
Зи рикIин гьисс
Акъуддайвал гатфари цуьк -
ТIебиатди гуьлуьшан,
Зун пак чилел дидед назик
Ханва, тушиз перишан.
Дагъвид намус, адан жуьрэт
Хайи чили гъана заз.
Самур вацIу вичин шуьрбет
Уьмуьрлух яз гана заз.
Яшайишда писни хъсан
Дадмишна за ватандин.
Багъри чил-накьв хьунухь кьакьан
Дамах я зи виждандин.
КIанзава заз - цIурурдай къай
АтIуз чилел нехишар.
Зи рикIин гьисс - ялавлу цIай
Жеч са куьнвай дегишар.
Уьмуьрдин рехъ
Заз уьмуьрди эверзава датIана,
Къадим дуьньяд сесерив рикI ацIуриз.
Четин рекье тIурфанри зун гатана,
Амма хьанач руьгьдин гьиссер кьацIуриз.
Жегьил уьмуьр бамишнатIан азабри,
Намердвилин тIвар намусдал хкажнач.
Муьгьуьббатдал гьужумнатIан кьасабри,
Илгьамдин цIа, умуд кана, агажнач.
РикIеваз мел-мехъер, халкьдин адетар,
Пак зегьметар гана хайи ватандиз.
Хайи чили багъишна заз хесетар
Лайихлу тир гьар са михьи инсандиз.
Рехъ ганач за мидявилиз, фитнедиз,
Лигимарна жув дуствилин рекьера,
Бязида хьиз кIур ганач за бинедиз
Чи бубаяр гьатай четин гьекьера.
ЧIулав йикъал, бедбахтвилел халкьарин,
Квахьна намус, рахшандариз хъуьренач.
Гьекь алахьиз, къабар хьанвай гъилерин
Зегьметдин фу за гъурбатда регъвенач.
Тербиядин имтигьанар кьабулай
Диде-буба - зи бахтунин малимар.
Гьулданди хьиз куьмуьрдин цIай кьабулай,
Куь чад хьана авурди зун лигимар.
Жумарт чанда хиял аваз фаракъат,
Жегьил уьмуьр элдин рекье тухузва.
Чаз герек я намус, виждан, гьакъикъат
Зи секинсуз рикIи гьа икI лугьузва.
Лезги я зун
Лезги я зун, зи миллет, чIал авай,
Чилин шардал накьв ала заз ватан тир.
Эренлардин къужахда зи кIвал ава,
Къариблухдин тавханадлай хъсан тир.
Лезги я зун, кьакьан дагъдин хуьрерни
Аранлухар, чуьллер авай гуьлуьшан.
Туьрездив чил муьтIуьгъ авур гъилерни
Шегьре рекьел дамах я заз гьамишан.
Лезги я зун, нефес лезги нугъатдин -
Лезги чIалан хуш я сесин улам заз.
Несил я зун хайи чилиз нубатдин,
Дидед лай-лай хьана сифте салам заз.
Лезги я зун пак мурадрин сел авай,
Сагъ къул патал я зи чандин зегьметар.
Дагълух чилел шад мехъерни мел авай
Ашкъилу я давамиз дуьз адетар.
Лезги я зун шуьрбет хъвазвай Самурдин,
Берекатдин чешме тир зи ватандиз.
Намуслувал таж я элдин абурдин,
Кьисмет хьанвай гьар са лезги инсандиз.
Лезги я зун, зи миллет зи дамах я,
Вуч хьуй миллет, эгер садвал тахьайтIа,
«Къванцин гада» риваят зи булах я,
Шарвилидив, эверна, чун рахайтIа.
Дуьньядикай рахунар
Дуьнья, вакай рахун рикIел къвечир зи,
ТакунайтIа гьахъсузвилер кIамай кьван.
РикI, кукра хьиз, хажалатри нечир зи,
Руьгьдик намус, чандик иви кумай кьван.
Инсаф авач, белки, уьмуьр жаза я:
Садаз - регьят, садаз - четин азабрин.
Гагь шадвилин, гагь гьижрандин хазна я,
Пара-тIимил ваз чида ви гьисабрин.
ТIебиат я тешкилайди гьижранни,
Мизан чIурна яшайишдин терездин.
Лигим рикIер аквадачтIан пашмандиз,
Диндирмиша! Дустар я дерт эвездин.
Куьз батIул я, дуьнья, чун, ви есирар,
Гьар жуьредин къуватралди басмишиз?
Ашкара тир тIебиатдин тахсирар,
Куьз ава, эл, куьн куь чанар асмишиз?
Шумуд миллет, шумуд диндин сагьибар
Хуьзва, дуьнья, вуна ви генг хуруда?
Сада къалуз муькуь патан айибар -
Къал, дяве ваз хас яни ви паруда?
Ягьсузвилин рекьева са инсанар,
Ала лугьуз чеб Аллагьдин эмирдал.
Винелай - чан, рикIин туькьуьл нукьсанар
Тикрар жезва девиррилай девирдал.
Гагь бендеяр къекъведа ви гьахъунихъ,
РикIиз сабур жагъуриз ви дуванда.
Къуват ава - таъсир жеда гафунихъ,
Гьардаз лайих чка ганва на чанда.
Буйругъ гузва чандиз нефсини,
Эхиратдин югъ алудна рикIелай.
Авай туш гьа, дуьнья, вахъ затI жизвини -
Кафандилай гъейри, тухур чилелай.
Ша кIватI ийин чирвал, гьуьрмет, девлетар,
Акьулдиз гуж муьтIуьгъ ятIа гьаяда.
Негь ая куь фитне, чуьруьк, туьгьметар,
Рагьмет къачун четин кар я дуьньяда.
ТакIан хьана заз
«Я кас, вуч я дидедин чIал?» -
Лугьудай кас ван хьана заз.
Дидедин нек тушир гьалал
Намуссуз такIан хьана заз.
Урусдал тир мецин хатIар,
Жуван чIалан недай кьатIар,
ЭкъилтI хьанвай* чинин астIар
Напак лап душман хьана заз.
Белки, тир жед районэгьли,
Фад шегьерда хьанвай сейли.
Маса гузвай лезгид иви
Къиретсуз нукьсан хьана заз.
Тандин либас - ягьсуз партал,
Куьруь мекер алаз патал,
Веледни гвай - сарсах абдал -
Сад-садалай яван хьана заз.
Кьил тир жеди ичIи турба,
Къе негьда чIал, пака - буба.
Валай хаин жагъич зурба,
Чир хьана хъсан хьана заз.
Аферин хьуй хуьзвай гъуьлуьз,
Ялтах сифет хъвердай милиз,
Агакьдалди хайи хуьруьз,
Автобус дуван хьана заз.
___________________
* ЭкъилтI хьанвай - акъад хьанвай.
Докъузпара
ТIварцIиз - кьуьзуь, вич тир жегьил
Дидед кьведра хана район.
На ви халкьдин шад суфрадал
Мад берекат гъана, район.
Лезги хуьрер я ви бине,
Са хизан тир зегьметчи эл.
Уьзуьагъ яз тарих куьгьне,
Къадим несил къвезва рикIел.
Самурский, гьам Мирзебег
Рухваяр я ви баркаллу.
Пак кIвалахрин кьуна этег,
Чи дагълух чил авур нурлу.
Шумуд шаир, шумуд алим
Битмишарна хуруда на,
Тербия гуз, ийиз лигим
Эренлардин паруда на.
Нисин дагъни Базар-Дуьзуь,
Альпинистар хьанва квев гуьр.
Кьакьанвилиз Европада
Дамах я чи Къурушрин хуьр.
Дагъни аран, ачух чуьллер
Куьтягь тежер девлет я ваз.
Артух ая малар, хипер,
Сифте четин зегьмет я ваз.
Авадан хьуй ви кIвал, ви югъ,
Чна къе ваз алхишзава,
Гатфар кьиляй, бахчади хьиз,
На ви къамат дегишзава.
Самур вацIун абукевсер
Генг чуьллерал алаз хьурай.
Гележегди акъудна цуьк,
Вахъ девлетар галаз хьурай!
Зи уьмуьрдин шикилар
Зи уьмуьрдин шикилар,
Шикилар зи бахтунин,
ЧIагурна зи гуьгьуьлар
Рангаралди вахтунин.
Пайдахдик кваз ал-жегьре
АтIай уьлквед уьруьшар,
Зи рикIин рехъ - дуьз шегьре
Тежез ава дегишар.
Йисар, яшдин харман зи -
Шагьидар кьве девирдин.
Хиялрин сел - карван зи,
Гьакъикъат зи эмирдин.
Хьанва уьмуьр - гурарар
Авай къе зав бягьсина.
Къачуз куьлуь къадамар
Гьахълувилин женгина.
Гагь аруш жез кIвачера
Чил азабрив ацIанвай,
Мергьяматсуз рикIерин
Агъудив пис кьацIанвай.
Гуя ам заз кемен хьиз
Инсафсузри вегьенва,
Иудадин темен хьиз,
ТIамгъадилай ифенва.
Шаклу я зун, уьмуьр, ви
Муьгьуьббатсуз рангарал,
Амма дидед нехишар
Алама зи тангарал.
Лай-лайдин сес сифте яз
Назик ванцел багъишна,
Пак некIедай куьрпе яз
За кIанивал дадмишна.
Хайи чилин ватандин
Халкьдин чIалан гужлувал,
Намус-девлет инсандин,
Дидед вилик буржлувал.
Вуна гъана, уьмуьр, зи
Вилик дуьнья гьакъикъат.
Гагь шадвал, гагь сефилвал,
Гьам рагъ, гьам йиф мишекъат.
Суна
РикIе гьатна ви хуш ухшар,
Квахьнава зи йифен ахвар,
Эвер гайла, кьуна ви тIвар,
ЭкъечI вилик хъуьрез, Суна.
Хуьре ава рушар шумуд,
Вун яр хьуник ква зи умуд,
РикIин сирер ийин агуд,
Ша фин чун са гелез, Суна.
Зунни вун хьиз я са инсан,
Лезги чилин накьвар масан,
Чун эвленмиш хьана хъсан,
ТуькIуьрин са хизан, Суна.
Хамир, я руш, на зи кефи,
Вун акваз, зун жеда сефи,
Илчивиле къуда ими
Къе няниз кIвализ, Суна.
КьатIутI зи дерт, тамир сефил,
Гана жаваб, ачух гуьгьуьл,
Зи мурад зи рикIин негъил,
Зи эрзиман вун я, Суна.
Лезги руш
Гатун юкъуз, жив хьана, зун цIразва,
Гъиле кьуртIа, авахьда зун гъилерай.
Зи ашкъидин гьар са цIелхем ргазвай
Аквазва заз лезги рушан вилерай.
Къуш цуькведиз килигдайвал, руш, вуна
Зун акур кьван заз чинеба килигмир.
Ша зи вилик, кутур чандик хуш вуна,
Зи жегьил чан кабаб хьиз на илигмир.
Ви вилери тухузва зун, вацIу хьиз,
Пагь, ава, руш, ви беденда гьерекат.
Михьи я вун Шагь дагъларин бубу хьиз,
Вун акун заз шадвал я, гьам берекат.
Зун дагъ ятIа, живед кьунвай кукIушар,
Вун са рагъ я, нур гузавай а дагъдиз.
КIанзавайди, кIанзавайди, азизди,
Ви нурари чим гун я зи утагъдиз.
"Лезги газетдин" 2025-йисан 35-нумрадай.
_________________________________________
«Заз къурху туш душмандихъай…»
КIан я ваз зи рикI
Гагь са вахт жеда,
Шехьда вун, зи рикI,
Гьахъсуз дуьньяда
Гьахъ жагъур тежез.
Къанунни къайда
Негьда вуна, рикI,
Яшайиш гуьзел
Накьв жагъур тежез.
Тергзавай гьахъсуз
Гунагьсуз эллер,
Чапхунрин хиял
КьатIуз кIан я ваз.
Элкъвенвай вацIуз
Ивийрин селлер,
Михьи кьве гъилел
АтIуз кIан я ваз.
Хана шуьше хьиз
Тежервал кIусар,
Ягь-намус эвел
Гужлуз кIан жеда.
ЧIуру яз эгер
ХуьзватIа пайсар,
Жува акьур хьел
Къалуз кIан жеда.
Фагъиррин рикIив
Агатна мукьув,
ТIалдикай са пай
Къачуз кIан я ваз.
Къалуриз тежер
Инсанвилин гьай,
Ширин тир мецел
Лугьуз кIан я ваз.
ГъвечIи хуруда
Гьуьл я вун чIехи,
Муьгьуьббат ачух
Тухуз кIан жеда.
Гьахъсузвал акваз
Жув жедалд рехи,
Гьахълувилин гел
АтIуз кIан жеда.
Кьисмет
ЧIехи крар мад ава
Инсан твадай гуьнгуьна.
Анжах абрун дад ава
Кьисмет лугьур гафуна.
Эгер адаз хуш яз вун,
Масад патал лал ятIа,
Садаз хьана дуьз къафун,
Садаз рикIин тIал ятIа,
Лишан хьана вахтунин,
Уьмуьрдин рехъ чIагурда,
Садаз кукIуш тахтунин,
Садаз дегьне гьазурда.
Белки, ам чаз савкьат я,
Реббидив гвай уьруьшар,
Садаз шадвал, такьат я,
Садаз бахтун биришар.
Кис хьухь!
Кис хьухь! Кис хьухь! Наз гумир,
Кьуд пад саях япар я.
Элдив ви тIвар кьаз тамир,
Чаз вакайни хабар я.
Са вахт авай, буйругъар
Гудай вуна тахтунай,
Гьайиф-гьайиф, къуллугъар
Акъатна ви бахтунай.
Яваш! Яваш! Хьухь секин,
Гьеле халкьдин вилерал
Кьеж аламаз накъварин,
Кьел вегьемир хирерал.
Дин
Акьуллу ятIа друзар,
Кьве диндикай саднавай,
Чибур ятIа агьузар,
Динар гьарнихъ паднавай?
Сад хашпара, муькуьда
Исламдин дин тухузва,
Гуя гьахъ яз иуда,
Чпин дуьзвал къалузва.
Яраб гьи рехъ дуьз ятIа -
Таврат, Библия ва Къуръан,
Сад чIехи хьун куьз ятIа?
Анжах гьа рехъ твах жуван.
Садбуру цIуз икрамда,
Садаз Будда вине я.
Аллагьди чун халкьнатIа,
Чун хайи кас диде я.
Заз чиз, гьи дин къачуртIан,
Хуш хьана ви кефидиз,
Азаб, зегьмет чIугуртIан,
Икрамун я Реббидиз.
Къурху я заз
Заз къурху туш
душмандихъай,
Хатасузвал хуьда жуван.
Къурху я заз инсанрихъай,
ЧIал квахьзавай, намус яван.
Наз маса гуз, кьвечхел мез
Сиве аваз майдандавай,
Вилер шехьиз, пIузар хъуьрез,
Вич яргъа тир виждандивай.
Бязидахъай динда аваз,
Вичин хъендиз икрамзавай,
Лацу рангни чIулав акваз,
Гьалалдикай гьарамзавай.
Дустарихъай – дуст я лугьуз,
Ви кIвалахдиз шерик жедай.
Вафасуз кар вафаз къалуз,
Гардан куьрсна, вилик жедай.
Къурху я гьакI несилдихъай
Дуьз рекьелай алатзавай.
Тербиядхъай, эсилдихъай
Адетривай къакъатзавай
Заз къурху я чи дагъвийрин
Усал ахкун адетарни.
На лугьуди, пак ивидин
Хьанач дагъви миллетарни.
РикIерихъай, муьгьуьббатдин
Ялавлу цIай хкахьнавай.
Вилерихъай, къанлувилин,
Рангарин зар какахьнавай.
Къурху я заз, чир хьухь, дустар,
РикIе чIехи къастар ава.
Бязибурухъ миллетдин тIвар
Хуьдай чин ваъ, астIар ама.
КIелетрин кимел
Хуьруьн кимел КIелетрин
Жеда къариб хабарар.
Кьежей мецив суьгьбетрин
Ачух тийиз тIапIарар.
Хъвер, зарафат дем жеда,
ГьакI сесерни саламдин.
Тербиядин гьем жеда
Гафаралди айгьамдин.
Белки, абрун зигьинди
Гаф бинедай кьатIузва,
Куьруь, кунту суьгьбетри
Гапурди хьиз атIузва.
Хуьз алакьда тагъсибни,
Арифар я жавабрин.
Дугъри касни, кесибни
Хура жедач азабрин.
Анал чIехи форумар
Фида чпин жуьреда.
Мецел хци алимар
Бул я Самур дереда.
Хата квачир къалмакъал
Жеда тIул яз хесетрин.
Низ кIан ятIа мах, мисал,
Алад кимел КIелетрин.
Зулун йиф
Гагь чара жез гъетервай,
Гагь далу гуз цифериз,
Вацра усай экверкай
Багъишзава чилериз
Вичин, сефил цIелхемар,
Дагъдин къуза хур къалуз,
Бегьерлу чуьл кьуранвай.
Сефил хьанвай чуьллериз,
Гару беден гатанвай,
Хважамжамдин бегьер хьиз,
Зарлу рангар чкIанвай.
Жанг ава гуз саламар,
Вичин къуват - тур къалуз.
Чил муьтIуьгъиз атанвай.
Хушраканрин сачахар
Куьрс жез кьуру нацIаркай,
Лал я гурлу булахар,
Чара хьана вацIаркай,
КIевнава цин стIалар,
Авахьзамач чIур къалуз,
Вичи хуьлер атIанвай.
На лугьуди, дагълара
Дегиш хьанва уьруьшар,
Тик синера рагара
Туна айру нехишар.
Амач гуьзел дамахар,
Нурлу гъетер, чин къалуз,
Цавун чиниз чкIанвай.
Зулун йифе, нагъв алаз,
Заз гъамлу чин къалузва.
Гуя чна сада-садаз
РикIин сирер лугьузва,
Чара ятIан уламар,
ТIебиатди зур къалуз,
Чи ялгъузвал кьатIанвай.
Вилер
Вилер,
Вилер,
Экуьбур!
РикIин
Ачух дарвазар,
Гуьзгуьяр я
Алай нур,
Къалуз
Сирлу авазар.
РикIин
Дерин къатарин
Дустар я
Фад гьайзавай.
Дердер,
Гъамар, шадвилер
Са суфрадал
Пайзавай.
Вилер,
Вилер,
Экуьбур!
Экуьвилин чешмеяр.
Гагь нагъв,
Гагь рагъ,
Хар алай.
Хважамжамдин сачахрин
Рангарикай
Зар алай.
Бязибур куьн
Перт жеда,
Бязибура гьерекат.
Бязибуру багъишда
Ачух чинай
Берекат
Вилер
Туна вилера,
Хьел авуна
ЦIелхемар,
Гьазур жеда
АкIуриз
Муьгьуьббатдин къелемар.
Гьайиф,
Гьайиф,
Бязибур,
Яван-руьгьсуз
Тан жеда.
Вилер
Къайи къванер яз,
Чина саврух,
Къан жеда.
Буьркьуьдахъни
Руьгь жеда,
Магьрум ятIан
Ишигъдиз.
Чанда
Намус,
Ягь жеда,
Кьисмет
Вичиз муьтIуьгъиз.
Ахтармишиз каинат,
Илгьам
Жеда теменда.
РикIе
Ифин, муьгьуьббат.
Анжах,
Вилер къанлубур,
Куь чанда
ХупI хажалат.
Вилер,
Вилер,
Чешнеяр
Сефилвилин, шадвилин!
Вилер,
Вилер,
Чешмеяр,
Уьмуьр
Анжах садвилин!
Гам хразвай руш
Вуч гуьзел я, руш, ви вилер
Рангарикай нехишзавай,
Гамун чинал назик гъилер
Элкъуьриз, кваг арушзавай?
Хважамжамдин зарлу нурар
Гекъигун ви къилих ятIа,
Гамун нехиш гъизвай фурар
ЧIагуриз, вун къаних ятIа?
Илгьамдикай дигмиш хьана,
ТIвар хкажай дагъви рушан,
Дегь заманра битмиш хьайи,
Сирерал на хкизва чан.
«Уьзуьмдин багъ»
къадим чешне,
Муьгьуьббатлу къамат чилин,
На лугьуди, хатIар куьгьне
Къалузва ваз дидед гъилин.
Пагь, вилериз карагзава
Ядигарар, аламатар,
Руьгьди гуя тIалабзава
Хуьнуьх багьа аманатар
Ара-ара хкиз рикIел,
Гагь девирар гъизва вилик,
КIвале жедай рушарин мел,
ГьакI манидин сесни назик.
Къурмиш ийиз зи чанда дем,
Кутазва зак лувар вуна.
Аферин хьуй, хуьзва мягькем
Дагъви рушан гьунар вуна.
Пагь, дидедин теменар
Пагь, теменар,
Теменар –
Чими ифин,
Муьгьуьббат.
Шад уьмуьрдин
Чеменра
Къизгъин я куьн,
Гьакъикъат.
Руьгьдин
Ачух варариз,
Къачуз
Шаддиз къадамар,
Халкьдин
Дерин къатариз
Ачух я куь уламар.
Пагь, чим ава,
Теменра,
Пагь, теменра -
Муьгьуьббат.
Ялав кузва
Беденра,
ГьакI къарихвал,
Гьарарат.
Анжах, анжах
Дидедин
Темен хьана
Эбеди
КуькIуьрайди цIелхемар
Илгьамдиз гьар
Жуьредин,
Пагь, дидедин
Теменра,
Ваз уьмуьрдин
Нур жеда.
Ялавлу руьгь,
Беденра,
Чанда, гьелбет,
Зур жеда.
Мидяйбурвай кеменда
Тваз тежедай
Тур жеда.
ЧIехи девлет -
Муьгьуьббат,
Ватан патал
КуькIвенвай.
Цуьквер авай
Къатба-къат,
Сих хизанни
ТуькIвенвай.
На лугьуди
Сир я ам,
Вичин рикIе
Мугнавай,
Гъейратсузвал, алчахвал
Фадлай вичи
Ругнавай,
Назик чандай
Уьмуьрлух,
Вичин ифин
Багъишна.
Тунач рикIер
Къариблух,
Ачух рекьер
Уьруьшна.
Къанажагъдин девлетар
Хазна тиртIа
Беденда?
Саях йифер,
Зегьметар
АвайтIа гьа
Теменда?
ПIуз эцигна
ПIузарал,
Вилер туна
Вилера,
КуькIуьрна
Нур, цIелхемар
Гьамишалугъ рикIера.
Пагь, теменра
Нур ава,
Пагь, теменра
Муьгьуьббат!
Хайи халкьдин
Зур ава,
Миллет,
Ватан,
ЧIал,
Нугъат,
КуькIуьр ийиз
Беденра
Кьисметдин нур,
Муьгьуьббат.
"Лезги газетдин" 2026-йисан 35-нумрадай.