“Зи  бизнес”:  месэлаяр веревирдда

Россиядин вири мулкунал кьиле тухузвай “Зи бизнес” форум гила Дагъустан Республикадани жеда. Алай йисан эхирдалди  “Зи бизнес” форумар уьл­кведин 25 шегьерда тешкилда, абуру 60 агъзурдалай гзаф иштиракчияр кIватIда.

Форумдиз гьазурвал гьикI аквазватIа ва адан сергьятра аваз гьихьтин ме­сэ­лаяр­ веревирддатIа, гьадакай и йикъара кьиле фейи пресс-конференциядал РД-дин Гьукуматдин Председателдин заместитель Гьа­жимегьамед Гьуьсейнова, республикадин карчивилин ва инвестицийрин  рекьяй Агентстводин руководителдин везифаяр вахтуналди тамамарзавай Гьажи Гьасанова ва “Синергия” университетдин  ви­це-президент Юрий Мурадова суьгьбетна.

Малум хьайивал, Дагъустанда “Зи бизнес” форум са юкъуз — 30-ноябрдиз  кьиле фида. Махачкъалада Аваррин Гь.Цадасадин тIварунихъ галай муздрамтеатрдин да­раматда ачухдай адан кIвалах пакаман саятдин 10-даз башламишда ва няналди давам жеда.

Карчивилин программадин кьилин темайрикай Юрий Мурадова лагьана. Адан гафаралди, милли проект 2024-йи­салди да­вам жеда. Адан вилик квай асул ме­сэла­ гъвечIи ва юкьван карчиви­лин карханайрин кьадар артухарун ва уьлкведин ВВП-да абурун пай 30 процентдив (къенин ­юкъуз — 23%) агакьарун я.

Ада хабар гайивал, форумдин кIва­лах­да гьам федеральный, гьамни региондин властдин органрин векилри, карчийри ва топ-менеджерри  иштиракда. Сегьнедал­ экъечIдай пешекарри агалкьунар хьайи ксарикай, бизнес кьиле тухун патал важиблу терефрикай ва икI мад суьгьбетда.

ГъвечIи ва юкьван карчивилиз куьмек гуникай рахадайла, Гьажимегьамед Гьуьсейнова къейд авурвал, и хел виликди тухун патал  федеральный бюджетдай са кьадар такьатар ахъайда.

“Алай йисуз анжах МСП-дин милли проектдай 850 миллион манат чара авунва. Санлай къачурла, карчивилиз куьмек яз 1,2 миллиард манат пул чара авун фикирда кьунва. Йисан эхиррай  “Зи бизнес” центр кардик кутун планламишнава. Регионда индустриальный “Аврора” парк арадал гъунин кIвалахни акьал­тIарзава. Гатуз­ чна МСП банкдин филиал ачухна, анай,  санлай къа­чурла, 600 миллион манатдин арзаяр агакьнава, 204 миллион манатдин кьве кредитдиз разивал ганва”, — лагьана Гь.Гьуь­сейнова. Ада гьакIни АЗС-рин иесийрихъ галаз санал кьилиз акъуд­завай проектдикайни лагьана: “Им гзаф важиблу, ихтибардал бинеламиш проект я. АЗС-рихъ галаз ала­къалу месэладал машгъул ксарин кIватIал арадал атанва, абур бизнес михьидаказ кьиле тухуз гьазур я”.

РикIел хкин, карчивилин пулсуз “Зи бизнес” форумар  РФ-дин Минэкономразвитиядин  милли  “Гъве­чIи ва юкьван карчивал ва кьилди къачур ксарин карчивилин теклифриз куьмек гун” проектдин сер­гьятра аваз кьиле тухузва.

Форумдал веревирддай асул ме­сэлайрик акатзава: МСП­-дин векилриз государст­водин патай куьмек; хсуси кIва­лах бинедилай гъиле кьунин кье­тIенвилер;  бизнес патал цIийи технологияр; нетижалу команда арадал гъунин сирер; агалкьунрин гьикаяяр.

“Зи бизнес” форумди вилик эцигзавай месэлаяр: государстводин патай куьмекдикай ва хсуси кар арадал гъунин ва ви­лик­ди тухунин мумкинвилерикай хабар гун; и рекье меслятчийрин институт арадал гъун; карчивилин рекье кIвалах башламишиз кIанзавай ксариз хсуси бизнес гъиле кьунин карда куьмекун.

“Зи бизнес” форумдал  аудиториядин вилик маркетолог, “Манн, Иванов и Фербер” издательстводин бине кутурбурукай сад тир Игорь Манн, карчи, инвестор Владимир Турман, Россиядин Федерациядин Игит, летчик-космонавт, дуьньяда сад лагьай алим-космический гимидин командир Сергей Рязанский, бизнес-тренер Дмитрий Ащепков ва са жерге маса пешекарар рахада.

Мярекатда иштиракун патал мойбизнес.рф сайтда регистрация авуна кIанда.

Жасмина  Саидова


Всего просмотров: 38

Читайте также: