«Жува жув хвейиди Аллагьдини хуьда»

Гьуьрметлу дустар! Ватанэгьлияр! Мукьва-кьилияр, амадагар, юлдашар, куьрелди, дуьньядин кьуд пата авай жуванбур! Алай вахтунда дуьньядин халкьарик коронавирус лугьудай зегьримарди зурба къурху кутунва. Къурху акатайла инсандин рикI зайиф жезва, адан ийир-тийир квахьзава, уьмуьрдин  шадвал пашманвилиз элкъвезва, яшайишда  авачир четинвилер авайди хьиз аквазва.

Квез малум тирвал, Дагъустандин халкьарин арада лезги халкь вичиз еке чирвилер, зигьинар авай, арифдар миллет яз гьисабзава. Лезги халкьди садрани, садан виликни гардан кIир авурди туш. Чи лезги халкьдиз вичин тарихда садазни такур кьван четинвилер акуна. Чи бубаяр, ата-бубаяр саки вири девирра гъил-гьиле кьуна, сад садан далу-даях  хьана,  дявейрин цIаярайни, уьмуьррин къаярайни экъечIна. Абуру чпин яшайишда шумудни са уьзуьрриз (къиздирмадиз, цIегьериз, тIегъуьниз) викIегьвилелди  аксивал авуна, бахтлу гележег туькIуьрна.

Зи фикирдалди, чпин бубайрин ахлакьдиз вафалу алай девирдин несилрикни гъулгъула акат тавун лазим я. Гъулгъула  пис куьмекчи я. Гьич са лезгидизни адаз рехъ гудай ихтияр авач. Чаз къе чи веледар, хтулар, птулар коронавирусдикай хуьдай дурумлу рекьер лазим я. Ихьтин четин вахтунда чна, вун гьинай, зун гьинай лугьуз  ваъ, чун вири санай, са халкьдин векилар я, лугьун лазим я.

Алай девир вилик девирар хьиз жерягьар кьит девир туш. Алай девирда чи ватандихъ, гьа жергедай яз чи республикадихъни,  бес кьадар тежрибалу духтурар, инсанрин къадир авай карчияр, регьберар  ава. Абуру вирида, кIусни энгел тавуна, саки гьар югъуз и азардин вилик пад кьаз алахънава. Чкайрал гьар са инсанди чпелай алакьдай куьмекар гуз, ватанэгьлийрин яшайиш гумрагьарзава. ТIварар кьун лазим туш. Абурун тIварар хъсанвал чидай лезгийри гьамиша чпин рикIера хуьда.

Ихьтин  вахтунда чунни къерех хьун лазим туш. Бес вуч авун лазим я?

Гьар са лезги, гьина яшамиш жезватIани, амай халкьариз, гъвечIи-чIехидаз, аял-куялдиз, яр-дустуниз,  мукьва-кьилидиз, къуни-къуншидиз михьивилин чешне жен.

Пешекар духтуррин,  ватандин халкьарин сагъламвилихъ рикI кузвай  регьберрин, шегьердин, райондин, хуьруьн къуллугъчийрин меслятрал амал ийин, салам-калам гудайла, санал кIватI хьайила, улакьда аваз фидайла герек тир мензил хуьз алахъин.

Герек авачиз кIваляй-хуьряй экъечI тийин. Сабурлувилелди, меслятдалди, гьуьрметлувилелди, захавилелди, вафалувилелди сад-садан къайгъуда  жен. «Жува жув хвейиди Аллагьдини хуьда», — лугьузва халкьдин мисалда.

Гьуьрметлу  ватанэгьлияр, сабур ая! Сабурлу инсандиз Аллагьди  бахтлу гележегни багъишда. Къуй куьн вири Аллагьди хуьрай! Амин!

Шайдабег Мирзоев, ДГПУ-дин профессор


Всего просмотров: 123
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире