Журналистрин суалриз жавабар гана

Алатай жуьмя юкъуз, 5-октябрдиз РД-дин Кьил Владимир Васильев Дагъус­тандиз атанвай  Россиядин  зегьметдин  ва  яшайишдин рекьяй хуьдай министр Максим Топи­линахъ галаз гуьруьшмиш хьана. Гьа и юкъуз­ Дагъустандин Гьукуматда РД-дин Кьил Владимир Васильеван ва Россиядин­ Федерациядин зегьметдин ва яшайишдин рекьяй хуьдай министр  Максим Топи­ли­нан­ регьбервилик кваз совещание кьиле фена.

Агьалияр кIвалахдалди таъминарунин месэладиз талукьарнавай совещанидилай кьулухъ В.Васильева ва М.Топилина журналистрин са жерге суалриз жавабар гана. Сифте нубатда, СМИ-дин векилри Дагъустандин Кьиливай 1,1 мил­лиард манат кьенят авуниз талукь яз авай малуматдин патахъай хабар кьуна­.

Дагъустандин Кьил В.Васильев:

“Алай вахтунда чи гьар са минис­тер­стводиз, ведомстводиз талукь яз абурун кIвалахдин менфятлувиз къимет гузвай делил ава – бюджетдин такьатар кьенят авун. ИкI, рекьер эцигунин хиле алишверишдин нетижайрай хъсан экономия хьун гуьзлемишзава, здравоохраненида гьелелиг 40 миллион манат кьенятиз алакьнава. Къенин юкъуз Россиядин Президент Владимир Путина чи вилик эцигнавай кьилин месэлайрикай сад – Да­гъус­тан­да кесибвилин дережа агъу­­зарун я. Тухванвай кIва­лах­­дин нетижада азад хьанвай пулар агьа­лийрин яшайишдин меэслаяр гьялу­нин ва хъсанарунин рекье харжда­.

Президентди чи вилик мадни бюд­жетдин пуларинни адетдин инсанрин арада къат тахьунин месэлани эциг­­­нава, чна ам­­ни агалкьунралди кьилиз акъуд­­зава. Исятда 13 кас жавабдарви­лиз чIуг­вада. Абу­ру­кай 3 республикадин медико-социальный экспертизадин регьберар я. Абурухъ, си­лис­­дин де­лил­рал­ди, саки са мил­­лиард ма­нат­дин эменни ава. И кIва­лах давам жеда”.

Россиядин Федерациядин зегьметдин ва яшайишдин рекьяй хуьдай министр М.Топилин:

“Ихтилат са гьихьтин ятIани къалп пенсийрикай физвач. Исятда медико-социаль­ный экспертизадин хиле набутвал тайи­нар­навай ксарин гьалдиз садра мад килигунин­ кIва­лах кьиле тухузва, гьакIни набутвал гунин бинеяр ахтармишзава. Владимир Абдуалиевича зун гъавурда тур­вал, ина санлай гзаф кьадар инсанрин тахсир авач, амма бязи ксари­ къуллугъдикай ­далда кьуна, чпин агьваллувал хкажуниз рехъ ганва. Чна агьалийрив куьмек агакьдач лу­гьузвач. Малуматар, де­­лилар ахтармишда. Дуьм-дуьз тушир ва тапан делилрин би­недаллаз пулар инсанрив агакьзавачир”.

Журналистри пенсийрин законодательствода кьиле фейи эхиримжи дегишвилерихъ галаз ал­а­къалу яз пенсиядиз экъечI­дай вахт тIи­мил амай (предпенсионный) агьа­лийрин кьадар-кьисметдиз талукь язни итиж ийизвайди къа­лур­на.­

“Гуьгъуьнин йисалай Дагъустандиз пенсиядиз экъечIдай вахт тIи­мил амай, ам­ма са гьихьтин ятIани се­беб­ралди кIва­лах­дик квачиз амукьай инсанриз куьмек гун патал пулар чара ийида. Абуруз пешекарвал хкажиз, кIвалах дегишарун патал вердишвилер артухаруниз ва кIва­лахдин алай чкадал мумкинвилер гегьен­шариз куьмекда”, – алава хъувуна Максим Топилина.

Гьазурайди – Рагнеда Рамалданова


Всего просмотров: 27

Читайте также: