«Живедал цуьквер»

Ихьтин тIвар алаз и йикъара чав Дагъустандин ктабрин чапханади  урус чIалал акъуднавай цIийи ктаб агакьна. Адан автор РФ-дин писателрин ва журналистрин союзрин член, машгьур журналист ва шаир, рагьметлу  Гуьлмегьамед  Шугаев  я.

Шиирар урус чIалаз элкъуьрайди, ктаб туькIуьрайди ва адаз сифте гаф кхьейдини Дагъустандин халкьдин шаир Арбен Къардаш я.

Лагьана кIанда, им шаирдин ва публицистдин 70 йисан юбилейдин ктаб я. Ам алатай 2018-йисуз чи гъилиз атун лазим тир. Амма чавай лугьуз тежер себебралди цIи акъатна.

Лезги шаир ва журналист Г.Къ.Шугаев 1948-йисуз Докъузпара райондин Миграгърин ­хуьре дидедиз хьана. Ана юкьван­ школа акьал­­тIарна, Саратовдин госуниверситетдин юридический факультетда чирвилер  къачуна, ахпа кьисметди ам чи чIехи уьлкведин — СССР-дин жуьреба-жуьре пи­пIе­риз акъудна. Гьакьван жуьреба-жуьре хилера зегьметни чIу­гуна. Эхирни хайи хуьруьз, вичин багърийрин патав хтана, ана культурадин хи­ле (хуьре ва районда) кIва­лахна.

Вичин кхьинра авторди устадвилелди миграгъви писателрин — Шихнесир Къафланован, Жа­мидинан , Мурадхан Шихвердиеван, Гьаким Къурбанан, Мердали Жалилован, Зульфикъар Къафланован, Арбенан  ирс  давамарна, ам генани вини дережадиз акъудна.

“Живедал цуьквер” (“Цветы на снегу” автордин ирид лагьай ктаб  я.

Эхиримжи йисара ада До­къузпара райондин “Эренлардин сес” газетдин кьилин редактордин заместителвиле кIвалах­за­вай.

Вучда, кьисметди вичиз кIа­ни­вал ийида. Чавайни Гуьлмегьамед Шугаев фад къакъатна. Амма ирс чав гума. КIелзавай­бу­ру адан цIийи ктабдизни кIе­ве­лай итиж ийидайдал шак алач. Таржумачиди ам, вичиз кьве чIал­­ни (лезги, урус) дериндай чи­дайвиляй, устадвилелди, оригиналдин кьетIенвилер, лезги чIа­лан верцIивал, шииррин цIал­цIамвал хуьналди, чав агакьарнава. Аферин!

Мердали Жалилов


Всего просмотров: 26

Читайте также: