Жегьилрин тешкилатдин уьтквем камар

Алай вахтунда Дагъустандин халкьарин чIаларин гьалари чак иллаки секинсузвал кутазва. Халкьдихъ рикl кузвай, чlал хуьник ва вилик тухуник чпин пай кутаз алахъзавайбур акурла, зун гзаф шад жеда. “Кьиблепатан Дагъустандин жегьилрин союз” тешкилатдини вичин вилик хъсан кIвалахар кьилиз акъудунин везифа эцигнава. 

Тешкилат арадал атана акьван гзаф вахт туштIани, адан регьбер Равидин Абду­рагьимов кьиле аваз, халкьдихъ рикI кузвай, гележегдикай фикирзавай 70 касдилай виниз жегьилри еке кIвалахар кьиле­ тухузва. Абурук лезгияр, табасаранар, агъу­лар, рутулар, цIахурар ва азербайжа­нар ква. Вирида, сад хьана, халкь патал зегьмет чIугвазва. Бахтуни заз хъвер авур бере жегьилрин союзди “Кьиблепатан Да­гъус­тандин ирс” тlвар алаз конкурс тухвай­ югъ тир. Союздин жегьил векилри хайи чlа­ларал кхьизвай шаиррин акъажунар тешкилнавай. Зунни анин иштиракчи хьана.

Идалай вилик ва гуьгъуьнайни тухвай жуьреба-жуьре мярекатрин кьадар тlимил туш. Кьилди къачуртlа, “Чlал ама­­нат я!” лишандик кваз тухвай ге­гьенш фестиваль, Алирза Саидов рикlел хкуниз­ бахшнавай эдебиятдин ва хайи чlа­лариз талукь мярекатар, халкьдин дамах Сулейман Керимован тереф хуьниз талу­кьарнавай акция ва хейлин маса мя­рекатар рикlелай алат тийидайбур хьана.

Идалайни гъейри, Союзди мектебра аялрихъ галаз терроризмдиз акси суьгьбетар, РД-дин жегьилрин крарин рекьяй министерстводин куьмекдалди “Рекьера мукъаятвал хуьнин къайдаяр” конкурс, “Дагъустандин халкьарин меде­ният ва адетар” темадиз бахшнавай эл­къвей стол, спортсменрихъ галаз гуьруьшар… тухузва.

Ингье кьвед лагьай йис я гьар гатфариз Кьиблепатан Дагъустандин векилар тир студентрин слет тешкилиз. Чирвилерин, спортдин ва медениятдин рекьяй хъсан агалкьунар хьайи студентриз дипломар ва пишкешар гузва.

Союздин активистар гьамиша меркезда кьиле физвай субботникрин, акцийрин ва маса вири мярекатрин иштиракчияр я.

Къейд тавуна жедач, Союздин векилриз чпин фикирдик квай крар кьилиз акъу­дун гьамиша регьят жезвач. Акьалтзавай четинвилер арадай акъуддай рекьер жа­гъурун патал и йикъара Махачкъалада Р.Абдурагьимова тешкилатдин векилрихъ галаз гуьруьш кьиле тухвана. Анал вилик эцигнавай макьсадар кьилиз акъудун патал веревирдер, метлеблу суьгьбетар кьиле фена. – Чун патал виридалайни четин месэла тешкилатдихъ крар идара авун патал хсуси дарамат тахьун я. Гьар вацра собрание кьиле тухун патал­ са кьилдин чка жагъу­руниз мажбур жезва. Идалайни гъейри, Кьиблепатан Да­гъустандин районрин кьилериз, хсуси кар­чийриз, чIехи несилриз чна тешкилзавай мярекатар кьиле тухун патал алакьдайвал куьмек гун теклифзава, – лугьузва  Равидин Абдурагьи­мова.

Алай йисан мартдилай Союзди тешкилнавай “Кинодин ким” тIвар алай проект кьилиз акъудзава. Им Дагъустандин тарих, адетар, эдебият ва меденият гележегдин несилрал агакьарунин ва и месэ­лайрал жегьилрин фикир желбунин жигьетдай гзаф важиблу проект я.

Жегьилрин тешкилатди Расул Гьамзатован тIварунихъ галай милли ктабханадихъ, Шииратдин театрдихъ ва музейрихъ галаз сих алакъаяр хуьзва.

Жегьилрин тешкилатди алай вахтунда “Хъсан кlвалахрин эстафета” проектдик кьил кутунва. Адан сергьятра аваз теш­килатдин активистри чпин хуьрера ва районра михьивилер авунин, кьуьзуь инсанриз алакьдай куьмекар гунин кlвала­хар­ тухузва. Ашкъи авай гьар са жегьилдиз тешкилатдик экечIдай мумкинвал ава.

“Кьиблепатан Дагъустандин жегьилрин союз” тешкилатди къачузвай гьар са уьтквем кам чна тебрикзава. Баркаллу крарик кьил кутазвай жегьилар вини дережайрив агакьрай!

Жульета Омарова


Всего просмотров: 313

Читайте также: