Жегьил шаир (Зарафат)

Жегьил шаир тир. Гзаф рикI алай кхьинрал.

— Машгьур шаиррив къвезва! Кхьихьа! — румар кутазва къабачийрини. Гила цIийиз кхьиз гъиле­ кьунвай шиирдин цIарарив дуьз кьадай са гаф гьатзавач адаз. Ацукьна гьа гафунихъ къекъвезва.

— Дуьз къведай гафуни ранг гъида шиирдал, — лугьуз кьил кьунва кьве  гъилив. “Вун гьикьван ацукьда кхьинар ийиз?“А ви шиирдилай жуван салай  атIана недай са памадур хъсан я” — лу­гьу­дай  папан гафар рикIел хтана адан.

Гадар хьана къарагъна фена ам салаз. Язава пер. Гьар сеферда перцел кIвач илисдайла, цIийи гаф гьатзава адан фикирда. Анжах а гафар шиирдин цIа­рарив кьадайбур жезвач. Эхирни, цавай лув гузвай нуькIре “цIив-в” авурла, атана са гаф гьатна адан рикIе. Лап кутугай гаф.

“Агь! Фад хъфена кIанда кIва­лиз и гаф рикIелай фидалди!” — фикирда кьуна, рикIик тади кваз хъфизва ам. И арада адан виликай садлагьана тум галамачир хурлинкIдин шараг катна.

“Йуъ, тум галамачир — е!” — хиялди тухвана аламат хьайи ша­­ир, акъваз хьана. Хиялар хурлинкIдин галамачир тумуникай фейи шаирдин рикIелай шиир патал хуьзвай багьа, чарасуз гаф алатна. Акъваз хьана акIурнавайди хьиз гьанал.

— Гьиканва, итим, вун акъваз хьана хьи? — папан ван галукьна адахъ.

— Зи рикIел шиирдив кьадай са гаф атанвай, гьам фена рикIелай.

— Йу-у, еке гуж хьанва хьи, шиирдин гаф рикIелай фенатIа. А гаф гьикI атайди тир ви рикIел?

— Пер ядайла.

— Ян-и-е?! Чу-н шири-ин, акьул­ къвезвай хьтинди я ваз. ЯтIа фена пер хъиягъа, а гаф хкведа ви рикIел.

Нурудин Насруллаев


Всего просмотров: 26

Читайте также: