Жегьил музыкантри чпин алакьунар къалурна

И йикъара Ахцегьрин медениятдин кIвалин чIехи залда Р.Гьажиеван тIварунихъ галай аялрин музыкадин мектебдин кIвалахдин нетижайриз талукь концерт кьиле фена. Идакай «Лезги газетдиз» Ахцегь райондин администрациядин пресс-къуллугъди хабар гузва.

Концертдин программадик фортепианодин ва халкьдин отделенийра чирвилер къачузвайбурун лап хъсан нумраяр квай. Жегьил бажарагъри нубатдин сеферда тамашачийриз музыкадин рекьяй чпин устадвални алакьунар къалурна. И йисуз мектебдин руководстводи йисан къене республикадин жуьреба-жуьре конкурсрани фестивалра агалкьунралди иштиракайбурун диде-бубайриз чухсагъулдин чарар малумарун кьетIнава.

Эхирдай музыкадин мектеб куьтягьайбурув шагьадатнамаярни вахкана. Нетижайрин концерт халкьдин алатрин ансамблдин муаллимрин халкьдин авазар тамамаруналди куьтягь хьана.

«Лезги газет»  


Всего просмотров: 20

Читайте также: