Жаза кьезиларда

“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, ислен юкъуз Владимир Васильеван регьбервилик кваз Махачкъалада совещание кьиле фена. Законодательный, исполнительный ва чкадин самоуправленидин органрин руководителри иштиракай мярекатдин сергьятра аваз са шумуд месэла веревирдна.

Республикадин Кьили Дагъустандин вилик-кьилик (элита) квайбурун уьмуьрдин гурвал, кьадардилай артух девлетар хьун кье­тIендиз къейдна.

“Дагъустан патал четин вахтар акьалтI­нава. Вилик-кьилик квайбурун гурвал республикадиз гзаф багьаз акъвазна. И кар виридаз акуна, ван хьана”, – лагьана Владимир Васильева.

Ада чпин кIвалахар михьи тушиз кьиле тухвайбур, везифаяр  нагьакьандиз тамамарайбур патал къанундив кьазвай са рехъ авайди къейдна: чуьнуьхайди элкъвена вахкун.

“Уголовно-процессуальный кодексда “хьайи зиян арадал” хкун лугьудай ибара ава. Ихьтин рекьерин тереф чнани хуьда. Пулар кIватIиз, жавабдарвилихъай катун патал ришветар гуз чалишмиш жез, вахт пучмир. Идалди куьне гьалар авайдалайни писарда”, – алава хъувуна республикадин Кьили.

“Дагъустандин халкьди дамах гвачиз, се­киндиз, гзаф агъайнавилелди уьмуьр тухузва, гьикI хьи, республикадин жемиятдин са пай лап хъсандиз яшамиш жезвай. Вилик­дай къанунсуздаказ девлетлу хьайи инсанрин са пай гъавурда гьатна ва гьаларай экъечI­дай  теклифзавай рехъ кьабулни авуна. Ихьтин дуьшуьшра чна абурун кьисметдин жигьетдай артух кьетIи серенжемар кьабулдач. Яргъалди азадвиликай магьрум авунилай гъейри, кIвалин шартIара дустагъ авун ва жазадин кьезил маса жуьреяр ава”, – давамарна Владимир Васильева. Амма, адан гафаралди, жазадин кьезил жуьреяр анжах  чуьнуьхайди гуьгьуьллудаказ халкьдал элкъуьрайбуруз талукь яз  кьабулда,  къанун-къайда хуьдай, къурулушдин суддин ва я гуьзчивалдай органрин куьмекдалди вахчур дуьшуьшра – ваъ.

Чи мухбир


Всего просмотров: 31

Читайте также: