Жавабдар везифаяр

Зун Герейханован хуьруьн администрациядиз фейила, ана агьалияр – гзаф, гьардахъни вичин дерди авай. Администрациядин секретарь  Гьажиханова  Селиматан  кабинетдиз  агьалияр физ экъечIзавай.

Зунни Селиматан патав фена ва за адавай вичин гьакъисагъ кIвалахдикай суьгьбет авун тIалабна.

Селимат 1958-йисуз Герейханован хуьре Гьажиханан хизанда­ дидедиз хьана. 8-класс хъсан къиметралди куьтягьай руш Дербентдин хуьруьн майишатдин техникумдик экечIна. 1979-йисуз ам агалкьунралди куьтягьай руш хайи хуьруьз хтана.

Жегьил пешекарди – комсомолдин членди совхоздин консер­виярдай заводда бригадирвиле  кIвалахиз гатIунна. Ана хъсан не­тижаяр къазанмишай руш хуьруьн советдин секретарвиле тайинарна. Ингье ада и жавабдар везифаяр ян тагана тамамариз 30 йис я. Адакай хуьруьн советдин депутатни хьанай.

Фадлай кIвалахиз, гъавурда гьатнавай Селиматан патав да­тIана агьалияр къвезва. Гьихьтин месэла хьайитIани, ада дуьз рехъ­ жагъурда. Милайимдиз рахадай, чарадан дердиникай хабар­ кьадай С.Гьажихановадилай агьалияр рази я.  Ам хуьре вири м­ярекатрик аквада.

– Алай вахтунда са бязи четинвилерни тахьана авач, – лугьуз­ва С.Гьажихановади. – Бязи месэлаяр регьятдиз гьялиз жезвач. Совхоз чкIана, чилер арендада вахкана. Амма, гьайиф хьи, инсанар гъавурда гьатзавач. Бязибуру 49 йисан муддатда вуганвай чилер ишлемишзавач, я налогар гузвач, я ишлемишзавайбуруни герек документар туькIуьрзавач.

Алай вахтунда чун, вири жуьредин серенжемар ишлемишна, абурувай налогар къачуз алахъзава.

Вадим Жамалдинов


Всего просмотров: 25

Читайте также: