Зегьметдиз — къимет

“Лезги газетдин” редакциядин коллектив РД-дин Кьил Владимир Василь­еван разивилин чарчиз лайихлу хьана.

18-январдиз Дагъустандин Кьил Владимир Васильева СМИ-рин векилрихъ галаз гуьруьш кьиле тухвана. Мярекатда республикадин Гьукуматдин Председатель Артем Здунова, РД-дин Кьилин ва Гьукуматдин Администрациядин Руководитель Владимир Иванова, федеральный, республикадин ва районринни шегьеррин СМИ-рин кьилин редакторинни мухбирри иштиракна.

Гуьруьшдин сергьятра аваз Владимир Васильева журналистриз мукьвара къейд авур пешекарвилин сувар — Урусатдин печатдин югъ мубаракна.

Республикадин регьбер алатай йисуз хьанвай агалкьунрикай куьрелди рахайдалай кьулухъ журналистри адаз РФ-дин Президент Владимир Путинан Чарчихъ галаз алакъалу суалар гана.

Мярекатдин эхирдай Владимир Васильева кIвалахдин рекье тафаватлу хьайи журналистрив шабагьар вахкана. Алатай йисуз “Зи Дагъустан” лишандик кваз кьилиз акъудай еке метлеб авай проектрикай халкьдин гегьенш къатар хабардар авунин рекье нетижалудаказ кIвалахунай Дагъустандин Кьилин разивилин чарчиз “Лезги газетдин” редакциядин коллективни лайихлу хьана. Шабагь Владимир Васильева газетдин кьилин редактор Мегьамед Ибрагьимовав вахкана.

Къейд ийин хьи, “Лезги газет” республикадин виридалайни хъсан изданийрин сиягьда ава. Тираждал гьалтайла, эхиримжи са шумуд йисуз хьиз, цIини хайи чIалал акъатзавай газет республикадин государстводин СМИ-рин арада 1-чкадал ала.

Газетдин сайтдикай рахайтIа, ам Да­гъустандин виридалайни гзаф кIел­дайбур гьахьзавай сайтрикай сад я. ­Йи­къан къене юкьван гьисабдалди, “Лезги газетдин” сайтдиз 10-15 агъзур кас гьахь­зава.

Агьмед Магьмудов

 


Всего просмотров: 44
Подпишитесь на наши каналы:

Читайте также:


Новости партнеров