Закат гуникай

Закат гуникай

Са сеферда са касди машгьур суфий Шибилидивай хабар кьуна: “200 динардин кьадарда авай такьатдин закат гьихьтинди я?”. Шибилиди а касдивай хабар кьуна: “Жув патал хабар кьазвани, тахьайтlа, зун патал?”. Суал вугайди тажуб хьана: “Зини ви закатдин арада тафават авани кьван?”. Шиблиди жаваб гана: “Эгер закатдин гьакъи вуна гуз хьайитlа, 5 динар гун лазим я. Гьакъи за гуз хьайитlа, гьа пулдин кьадар вири гуда”.

Камаллудан жаваб

Са камаллуди вичин сухтадихъ галаз луьткведа аваз физвай. Сухтадиз вичин муал­лимдиз гьихьтин ятlани камаллу гафар лугьуз ва вич адаз бегенмишариз кlанзава. Яргъалди фагьум авурдалай кьулухъ сухтади луьткведин кlан къалурзава ва лугьузва:

– Исятда чинни кьиникьин арада авай мензил и кьулунин яцlувал кьван я.

Камаллуда адаз гьасятда жаваб гузва:

– Са сят инлай вилик, кьураматдал къекъведайла, гьа и мензилни авачир.

Девлет ва са хупl яд

Са сеферда Гьарун ар-Рашидан патав машгьур камаллу кас Ибн Саммак атана. Гьаруна вичин девлетдал, гьукумдал лавгъавилелди дамахзава. И вахтунда абуруз яд гъизва. Фейжан­ къачуна, Гьаруназ са хупl хъваз кlан хьайила, Ибн Саммака хабар кьада: “Эй, халиф, эгер цихъ гьарарат яз рекьидай чкадал атайтlа ва вавай са хупl цин эвезда халифатдин са пай тlалабайтlа, вун рази жедани?”. Са тlимил фикирна, Гьаруна жаваб гана: “Эхь, рази жеда”.

Гьаруна яд хъвайидалай кьулухъ Ибн Саммака адавай хабар кьазва: “Эгер хъвайи яд, винел ахкъат тавуна, хуквада амукьайтlа ва вун дири хъувун, цикай азад авун патал халифат­дин кьвед лагьай пайни тlалабайтlа, вун рази жедани?”. Гьаруна мад жаваб гузва: “Гьелбетда­, рази жеда”. И чlавуз Ибн Саммака лугьузва: “Гила ви халифатдин къимет малум хьана: са хупl яд ва ам хкуд хъувун. Акl ятlа, икьван къанихвилелди ам кlан хьун лайихлу кар яни?!”.

Гьазурайди – Куругъли Ферзалиев


Всего просмотров: 78

Читайте также: