Ялахъвийрин езне

Алатай асирдин эхирра Астрахань шегьерда къайдаяр хуьдай къурулушда кIвалахзавай  Николай  Гаврилов  анин техуниверситетдин муаллим  Гуьлагъа  Азизовадал  ва ам хайи Я­­лахърин хуьрел ашукь хьана. ТIебиатдал, чи уьлкведин ерийрал, вичиз хуш хьайи гьар са затIунин ва инсандин шикилар чIу­гу­нал рикI алай Николая, Гуьлагъани галаз мукьвал-мукьвал Зе­хе де­реда авай Ялахърин хуьруьз хквез, уьмуьрдин юлдашдин диде-бубадал кьил чIугваз хьана. Гьар сеферда Ахцегь райондиз хтайла, ада вичин рикI алай кар-шикилар чIугун – фикирда аваз, гзаф материалар шегьердиз хутахиз хьана. Хуьруьн чкада­, дагълух тIебиатдин къужахда аваз арадал атанвай шикиларни тIимил туш. Абурай чаз Ахцегьрин куьгьне магьлеярни муькъвер, Зегье дерединни Ялахърин хуьруьн акунар, кьилдин инсанар-зегьметкеш дагъвияр аквазва. Адахъ Астрахандиз, Санкт-Петербургдиз, Махачкъаладиз, Каспийскдиз бахшнавай шикилар гзаф ава. Абур автордин гьанра яшамиш жезвай ярар-дустари, искусстводал рикI алай, хайи ерийрихъ цIигел ксари чпин хсуси коллекцийра, кIвалера багьа ядигарар яз хуьзва.

1952-йисуз Астраханда дидедиз хьайи Наколая гьана пешекарвал къачуна. Яргъал йисара областдин къенепатан крарин къурулушда кIвалахна. Подполковникдин чинда аваз пенсиядиз экъечIай ада 2003-йисалай инихъ Астрахандин вычеслитель­­ный техникадин колледждин директордин заместителвал ва муаллимвал ийизвай. Алай вахтунда пенсияда авай ада вичин­ рикI алай кардиз худ ганва, сад-садалай хъсан шикилар арадал къвезва.

Са шумуд йис вилик Махачкъалада ракьун рекьин вокзалдик, гуьгъуьнлай Ахцегьа туьш хьайи чун таниш хьанай. А вахтунда зун тIебиатдин ва чи хуьрерин гуьзел акунрин шикилар ягъунал машгъул тир. Николай Владимировича заз гьар жуьредин меслятар къалурдай. Ада вичи чIугур шикиларни Интернетдин куьмекдалди заз къалурдай, фикир хабар кьадай. Чи дуствал къвердавай мягькем хьана. Гьар сеферда хизанни галаз Дагъустандиз хтайла, ада вичикай хабар гудай. И мукьварани Николай Гаврилов Ялахъиз хтанвай. Вичи чIугунвай “Алатзавай вахт” шикил хуьруьз-администрациядиз савкьатни гваз. Ялахъвийри чпин езне лайихлудаказ къаршиламишна.

“Зи шадвилихъ кьадар авачир! Гила зун Ялахърин хуьруьн гьуьрметлу агьали хьанва. Сагърай”, – лугьузва Николай Гаврилова.

Администрацияда Николай Гаврилов ва адан уьмуьрдин юл­даш Гуьлагъа Азизова Ялахърин хуьруьн кьил Шихкерим Жабраилова, чкадин депутатри кьабулна ва художникдиз “Ялахърин хуьруьн гьуьрметлу агьали” лагьай тIвар гана.

Мугьманри чеб сад-садахъ галаз таниш хьайи вахтар рикIел хкана, гъвечIи ватан рикIе аваз, Астраханда кьиле тухузвай уьмуьрдикай суьгьбетарна ва яратмишунрал ихьтин къимет эцигунай сагърай лагьана.

Эмираслан Шерифалиев


Всего просмотров: 44

Читайте также: