Виридалайни хъсан 100 карчи хкяда

“Карханаяр патал им жувакай хабар гудай, майдандиз экъечIдай хъсан мумкинвал я. Идалайни гъейри,  ихьтин карханайриз  государстводин патай куьмек къачунин жи­гьетдайни  вилик жергейриз экъечIдай мумкинвал  жеда”, — и келимайралди РД-дин  карчивилиз куьмек гунин центрадин руководитель Загьиди Магьмудова республикада “Виридалайни хъсан 100 карчи” конкурсдиз арзаяр кьабулиз башламишнавайдакай хабар гана.

Республикадин “Дагъустан” РИА-дин майдандал и йикъара кьиле фейи пресс-конференциядал З.Магьмудова малумарайвал, конкурсда иштиракуни  гъвечIи ва юкьван бизнесда кIвалахзавай карханайриз анжах хийир гъун лазим я.

Эхиримжи делилралди, Дагъустанда гъвечIи ва юкьван бизнесдин 36 агъзурдалай виниз карханаяр ава.  Абуруз, яни чпин документар вири къайдада авай, законлудаказ кIвалахзавай ва малумарнавай  номинацийрик акатзавай карханайриз, республикада кьвед лагьай сеферда кьиле тухузвай “Виридалайни хъсан 100 карчи” конкурсда иштиракдай мумкинвал ава.

“Конкурсда гъалиб хьуни компанийриз цIийи дережадиз хкаж жез куьмек гуда, карха­надин тIвар гегьеншдиз раижда, им карханадин тарихда гьатдай хъсан делил жеда. Куьне­ фикир ая, агъзурралди­ карханайрин арадай виридалайни хъсан 100 компаниядин сиягьда­ гьатун а кархана патал гьикьван хийирлу кар же­датIа”, —  лагьана идарадин руководителди.­

Ада хабар гайивал, виридалайни хъсанбур хкягъунин асул макьсад Да­гъус­танда хъсан бизнес авайди къалурун я.

Конкурс 10 номинациядикай ибарат я: яшайишдин хилен карчи, экспортдин кIвалах, хуьруьн майишатдин хел, производство, виниз тир ва инновациядин технологийрин хел, эцигунар, къецепатан уьлквейрай гъизвай суьрсет чкадал гьасилзавайдалди эвезун, жегьил карчи, транспорт, агьалийриз къуллугъар та­мамарунин хел.

Малум хьайивал, иштиракчийриз  са номинациядай са арза гудай ихтияр ава. Сесер конкурсдин сайтда — www.100rd.ru —  гуз жеда, амма эхиримжи къарар пеше­каррикай ибарат комиссияди кьабулда.

“Карчийри регион яшайишдинни экономикадин жигьетдай вилик тухунин кардик кутунвай паюниз къимет пешекаррикай ибарат комиссияди гуда. Ам  властдин органрин векилрикай ва обще­ственникрикай ибарат жеда. Конкурсдин не­тижаяр чна алукьзавай декабрдин вац­ра кьиле тухудай шад мярекатдал кьа­да. Гъалиб хьайибуруз  статуэткаяр, дипломар ва махсус лишанар гуда”, — ла­гьана З.Магьмудова.

Конкурсда иштиракун патал сергьят­вилер авач, кьилинди карханади вахт-вахтунда налогар гун, сударик-дуванрик тахьун ва штатда къуллугъчияр хьун я.  Карчийривай арзаяр 2019-йисан 5-августдилай 1-декабрдалди  винидихъ къалурнавай сайтдин куьмекдалди гуз же­да.

Загьиди Магьмудова эхирдай къейд авурвал, 5-августдилай  РД-дин  карчивилиз куьмек гунин центрада карчийриз пулсуздаказ меслятар гудай центрадин кIва­лах баш­ламишда. Тамам делилар жагъурун патал ЦПП-дин официальный сайтдикай — cppdag.ru — менфят къачуз жеда.

Амина Муслимова 


Всего просмотров: 29

Читайте также: