Вири дидейрин хва

26-февралдиз Махачкъалада, Р.Гьамзатован тIварунихъ галай Милли библиотекада, лезгийрин тIвар-ван авай юрист, писатель ва шаир, филологиядин илимрин кандидат  Абил  Абдурагьманович  Межидован  (Сардар  Абилан)  яратмишунриз талукь мярекат кьиле фена. Иниз республикадин писателрин Союздай, газетринни журналрин редакцийрай, вузрай, масанрайни литературадал рикI алай хейлин ксар атанвай.

Виридалайни артух активвал Абил Абдурагьмановичан хайиди тир Сулейман-Стальский райондин ва ада кIвалахзавай Дербент шегьердин векилри къалурна.

Милли библиотекадин залда писателдин яратмишунриз талукьарнавай чIехи выставкани ачухнавай (тешкилатчи — библиотекадин къуллугъчи, РД-дин культурадин лайихлу работник Секинат Мусаева).

Мярекат РД-дин писателрин Союздин председатель, Дагъустандин халкьдин шаир Мегьамед Агьмедова ачухна. Ада Сардар Абилан яратмишунар, цIийиз чапдай акъатнавай пуд томдикай ибарат “Кьве дидедин хва” роман Дагъустандин алай аямдин литературада цIийи вакъиа тирди къейдна, автордиз мадни еке агалкьунар хьун алхишна. Адалай кьулухъ шад мярекат писателрин Союздин виридалайни жегьил секретарь, шаир Владик Батманова давамарна.

ЦIийи романдикай, адан художественный кьетIенвилерикай, автордин вичин лайихлувилерикай фикирар лугьудай мумкинвал гзаф ксарихъ хьана. Абурун жергеда лезгийрин машгьур писатель-энциклопедист, Межидоврин хизандин дуст Къурбан Акимов, Сардар Абилаз ДГУ-дин филфакда чирвилер гайи профессор Гьажи Гашаров, Сулейман-Стальский райондин собранидин председатель Штибег Мегьамедханов, «Лезги газетдин» кьилин редактор Мегьамед Ибрагьимов, ктабдал редакторвилин хейлин кIвалах кьиле тухвай  шаир, публицист Мердали Жалилов, «Самур» журналдин кьилин редактор, Дагъустандин халкьдин писатель Абдуселим Исмаилов, жавабдар редактор, шаир Зульфикъар Къафланов, Дагъустандин халкьдин духтур Азедин Эсетов, ДГПУ-дин филологиядин факультетдин декан, илимрин доктор Руслан Къадимов, технический илимрин доктор  Навруз Фаталиев,  илимрин доктор, шаир Фейзудин Нагъиев, Лезгийрин госмуздрамтеатрдин режиссер, Дагъустандин халкьдин артист Мирзебег Мирзебегов, писатель Нажмудин Шихнабиев, Сардар Абилахъ галаз санал Афгъанистандин дяведа хьайи Нариман Садыкъи,  Дагъустандин нотариальный палатадин президент Шамсудин Жалаев, Дербент шегьердин культурадин управленидин кьилин пешекар, лезги тават Гуьлпери Мирзебалаева, писателдин мирес, яргъал йисара Шарвилидин ролда къугъвазвай Гьамид Гьамидов ва масабур авай.

Мярекат чпин гуьзел сеслу манийралди Дагъусандин халкьдин артист Фаризат Зейналовади, лайихлу артист Руслан Пирвердиева мадни гурлу авуна.

Эхирдай межлисдин сагьибди вичиз ихьтин гьуьрмет авунай, яратмишунриз виниз тир къимет гунай мярекатдиз атанвай вирибуруз сагърай лагьана.

Сулейман-Стальский райондай атанвай дестеди писатель Сардар Абилав райадминистрациядин тIварунихъай ганвай Гьуьрметдин грамота ва лезги чуьнгуьр вахкана.

Мярекат  шадвилерин “Фироза” залда яр­гъалди давам хьана.

М. Али


Всего просмотров: 90
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире