Виликди финин месэлайриз килигна

3-апрелдиз Дагъустан Республикадин Кьилин везифаяр вахтуналди тамамарзавай Владимир Васильев СКЖД-дин начальник Владимир Пястоловахъ галаз санал Кеферпатан Кавказдин ра­кьун рекьяй, рельсерал алай автобусда аваз Махачкъала шегьердин ракьун рекьин вокзалдилай Дербент шегьердин ракьун рекьин вокзалдал кьван фена, хабар гузва РД-дин Кьилин ва Гьукуматдин Администрациядин пресс-къуллугъди.

Региондин руководителдихъ РД-дин Гьукуматдин Председатель Артем Здунов, РД-дин экономикадин ва территорияр вилик тухунин министр Осман Хасбулатов ва са жерге маса ксар галай.

Дагъустан Республикада ракьун рекьин комплекс – им региондин производстводин къурулушдин лап важиблу пай я. Республикада ракьун рекьерин яргъи­вал 509 километрдиз барабар я.

Махачкъаладай Дербентдиз фейи чIавуз СКЖД-дин территориальный управленидин начальникдин заместитель Захар Адамова региондин руководитель Тарки станция авай гьалдин гьакъиндай хабардар авуна, “ракьун рекьин ведомственный охрана” ФГП-дин филиалдин директордин заместитель Роман Филимонова охранадин даяхдин пункт авай гьалдикай сугьбетна.

Ахпа рельсерилай фидай автобусдин салонда РД-дин Кьилин везифаяр вахтуналди тамамарзавай Владимир Васильеван ва Кеферпатан Кавказдин ракьун рекьин начальник Владимир Пястолован иштираквал аваз совещание кьиле фена.

Гуьруьшдал яргъал мензилриз ва шегьеррин патарив гвай чкайриз пассажирар тухунин кIвалах гегьеншарунин, вагонрин парк цIийи хъувунин, остановкаяр алай чкаяр пайгардик кутунин, дашмишзавай парарин кьадар артухарунин мумкинвилер веревирдна.

Совещанидал къейд авурвал, Ке­фер­патан Кавказдин ракьун рекьи Да­гъус­тандин экономикада еке роль къугъвазва­. РД-дин территориядай яна тухузвай парарик, асул гьисабдай, наф­тIадин продуктар, тахта-шалман, техил акатза­ва­. Идахъ галаз сад хьиз, ракьун рекьин транспортди тухузвай парарин кьадарар артух хьун таъминарун патал жезмай кьван къулай шартIар тешки­лун­, парар ту­хунай гьакъи къачунин кIвалах пайгардик кутун, парарин иесийриз ери аваз къуллугъ авунин дережа хкажун герек я.

Республикадин территорияда пассажирар патал къулай шартIар тешкилунин барадай датIана кIвалах тухузва. ИкI, Дагъустандин агьалийрин тIалабу­налди алатай йисуз Махачкъала-Дербент маршрутдиз алава яз кьве поезд ахъайнава.

Алай вахтунда республикада ше­гьеррин патарив гвай чкайриз рейсер ­тамамардай вад жуьт поездар желбнава, абурукай чкадин агьалийри гегьеншдаказ менфят къачузва. 2018-йисан сад лагьай кварталда региондин шегьеррин патарив гвай чкайриз рейсер тамамардай поездри 97 агъзур кас тухвана. Имни алатай йисан талукь тир девирдив гекъигайла 29 процентдин гзаф я.

Россиядин виридалайни къадим шегьер тир Дербентдив агакьайла региондин Кьилин везифаяр вахтуналди тамамарзавай Владимир Васильев ва СКЖД-дин начальник Владимир Пястолов зегьметдин ветеран, СКЖД-дин гьуьрметлу работник Гьажиагъа Мегьамедшерифовни галаз шегьердин вокзалдиз ва  ракьун рекьин тарихдин музейдиз килигна. Гуьгъуьнлай региондин Кьилин везифаяр вахтуналди тамамарзавай Владимир Васильева, СКЖД-дин начальник Владимир Пяс­толова ва РД-дин Гьукуматдин Председатель Артем Здунова журналистрин са жер­ге суалриз жавабар гана.

Владимир Васильева, кьилди къа­чуртIа, къейдна: “…Чаз ракьун рехъ авай гьалдиз, ана гьерекат ва хатасузвал хуьн тешкилнавай гьалдиз килигдай мумкинвал хьана. Чун ракьун рекьин Махачкъа­ла-Дербент участокда кIвалах вири жигьетрай мнфятлудаказ тешкилнавайдахъ инанмиш хьана”.

Вичин патай яз Владимир Пястолова  лагьана:  “Виридалайни  хуш  жедай  кар гьим я ла­гьайтIа, чи адетдинди тушир гуьруьш юбилейдин йисуз кьиле фена: 120 йис идалай вилик Махачкъаладай Дербентдиз кьван ракьун рекьяй поездрин гьерекат къайдадик кутунай. Дербентдиз рекье гьатай чIавуз республикадин руководстводихъ галаз санал чна Дагъустан Республикадин сергьятра транспортдин жигьетдай къуллугъ авунин ери хкажунин мурадралди санал кIвалаху­нин лап важиблу месэлаяр веревирдна”.

Артем Здунова къейдна: “Асул месэлайрикай сад гьим я лагьайтIа, чи эко­номический майдан чи сергьятра агал хьун лазим туш. Гьавиляй къунший­рихъ, гьа гьисабдай Азербайжандихъ галаз санал кIвалахун лап важиблу я. Идахъ галаз алакъалу яз чна сергьятдилай йи­гиндаказ ва къулайдаказ эля­чIу­нин кIва­лах тешкилунин месэлаяр веревирдна. Ихтилат сергьятдин ва таможнядин  гуьзчивал авуникай физва. Эгер таможнядал документар туь­кIуьрунин кIвалах эглешар тийиз хьайи­тIа ва сергьятдал яргъалди акъвазуниз мажбур тавуртIа, Махачкъаладинни Бакудин арада авай алакъа пайгардик акатда. И месэла чна жуван гуьзчивилик кутаз­ва”­.

“Лезги Газет”


Всего просмотров: 32

Читайте также: