Вилик еке крар ква

Гьажимурад Агьмедов Дагъустанда мотоциклдал алаз жуьреба-жуьре уюнар (трюки) ийизвай, спортдин и жуьредал рикIивай машгъул­ жезвай ва ам вилик тухуз чалишмишвалзавай кас (адаз мадни FMX райдер, яни мотофристайлдал машгъулдини лугьузва) я. Алукьнавай 2020-йисуз рекордар эцигуналди кьилиз акъудун пландик кутунвай крарикай, ниятрикай  тамамдаказ ада Махачкъалада, “Дагъустан” РИА-дин конференц-залда, журналистрихъ галаз кьиле фейи пресс-конференциядал суьгьбетна. Малум хьайи­вал, Гьажимурадан планрик 3 рекорд эцигун — мотоциклдал алаз Эльбрусдиз хкаж хьун, физвай поезддилай ва парашют гваз Сулакдин каньондиз хкадарун ква…

Гь.Агьмедова къейдзавайвал, и крар талукь къуллугъринни ведомствойрин гуьзчивилик кваз кьиле тухузва. СССР чкIайдалай ва ДОСААФ ага­лайдалай кьулухъ республикада мотокросс ва мотофристайлни амукьнач. Абурал машгъул­ сад-вад жегьил аватIани, спортдин и жуьре терг хьанва. Ам кIвачел ахкьалдарунин, вилик тухунин­ ашкъи-гьевес рикIе аваз жегьилди и рекье камар къачузва.

— Алай йисан 10-15-февралдалди заз мотоциклдал алаз Эльбрус дагъдиз хкаж жез кIан­зава. Икьван гагьди Россияда ихьтин кар авур кас авач. Вири зи рикIе авайвал хьайитIа, зун сад лагьайди жеда, — суьгьбетзава Гьажиму­рада. — Йигиндиз физвай поезддилай хкада­руникай лугьунин лазимвал авач. Заз чиз, их­тилат квекай ятIа вири гъавурда акьазва. Парашют гваз Сулакдин каньондиз хкадаруникай ра­хайтIа, и кар кьилиз акъуддай чка жагъанва. Дуб­ки посёлокда “Килигдай майдандилай”, хур квай чкади­лай ­мотоциклдал алаз йигиндиз фин, ахпани, парашют ахъайна, “ракьун балкIан­дал­лаз” гьавада “чарх ягъун”­ планрик ква, — суьгьбетна мугь­манди.

Журналистри адавай спортдин экстремальный жуьредал машгъул хьун хизанди гьикI кьа­булнатIа, четин трюкар кьилиз акъудун патал­ гьазурвилер гьикI ва гьина акваз­ватIа ва икI мад хабарар кьуна.

Малум хьайивал, хизанди Гь.Агьмедов машгъул жезвай спортдин жуьре хаталуди яз гьисабзава, са артух адан тереф хуьзвачтIани, рекьерни агалзавач. Хци кьабулнавай къарардал, гьар гьикI ятIани, хизан  рази хьанва.

Алай вахтунда Гь.Агьмедован гьазурлухвилин кIвалах кьве патал пайнава — гьар юкъуз мо­токроссдай ва спортзалда тренировкаяр кьиле тухузва. Исятда ам кьве гьафтеда Подмосковьеда жеда. Ана ада мотофристайлеррин пеше­кар дестедихъ галаз кIвалахда, яни устадвал мадни хкажда. Мотокроссдай тренировкаяр ла­гьайтIа, Махачкъаладин Тарки посёлокда кьиле фида. Ина махсус рехъ (трасса) туькIуьр­­нава. Тренировкайрин виридалайни четин пай гатфариз кьиле тухуда. И чIавуз парашютдай хкадаруниз гьазурвилер аквада.

Рагнеда  Рамалданова


Всего просмотров: 72
Подпишитесь на наши каналы:

Читайте также:


Новости партнеров