ВикIегь хва

ЦIи Афгъанистандай советрин кьушунар ахкъудайдалай инихъ 30 йис жезва. Гилийрин хуьряй а дяве­да 6 касди иштиракна: Къурбанов Юсуфа, Мегьамедов Валеради, Абасов Федора, Мирзебалаев Геннадия, Мегьамедов Фрида ва Казимов Играма. И ма­къа­ла кье­гьал хва   Къурбанов  Юсуфакай  я.                         

1961-йисан 1-июлдиз Ахцегь райондин Кьехуьлрин хуьре Къурбанов Къурбанан хизанда хьайи кьуд лагьай аялдал диде Гуьлезара­ вичин бубадин тIвар эцигна  — Юсуф. 1964-йисуз Къурбановрин хизан ­Гилидал куьч хьана. Юсуфа ина 8-класс, Огнида ПТУ акьал­тIарна, механизаторвилин пеше къачуна.

1980-йисан  майдиз  адаз Советрин Армиядин жергейриз эверна. Ам Брестдин къеледиз акъатна­. Ругуд вацра зенитчиквилин вердишвал къачур Юсуф ноябрдиз Афгъанистандиз ракъурна. Юсуфан рота Кабул шегьерда туна, адан асул къуллугъни дяведин суьрсет гъизвай машинрин карванар душманрикай хуьн тир.

Карванар физвай Термез-Кабул рехъ моджахедри гуьллеламишзавай. 1981-йисан 22-майдиз Кабулдиз хквезвай карвандиз моджахедри гьар жуьредин яракьрай гуьлле га­на. И  женгина зенитный расчетдин командир Къурбанов Юсуф ил­лаки тафаватлу хьана, душманар тергна, амукьайбур катна. Юсуфални залан  хер хьана, амма ада женгинин майдан тунач, юлдашрив хер кутIуниз туна, женг давамарна. Полихумри шегьердин госпиталда хер­ сагъар хъувурдалай кьулухъ ам вичин частуниз  хъфена. Кьегьалвал къалурунай Къурбанов Юсуф Яру гъед ордендиз лайихлу хьана.­

1981-йисан 4-августдиз Кушкадай Кабулдиз хквезвай бензинар авай карвандал душманди гьужумна. Карван хуьзвай советрин аскерри викIегьвал къалурна ва душман кьулухъди чIугуниз мажбурна, амма кьулухъай къвезвай са бензовоз абуру хъиткьинарна. Нетижада  Юсуфан 6 касдикай ибарат тир  зенитный расчет цавуз акъатна, пуд кас телеф хьана. Са вацра госпиталда хьайи Юсуф советрин духтурри сагъарна. Къалурай кьегьалвилерай командирри  Къурбановаз Советрин Союздин Игит ла­гьай тIвар гун па­тал документар туь­кIуьрна, та­лукь­ чкадиз ракъурна, амма са  гьихьтин ятIани себебралди игитдив вичин  награда  агакьнач.

Юсуф 1982-йисуз хуьруьз хурудал Яру гъед орден, «За отвагу», «За боевые заслуги» медалар алаз хтана. Ам гьакIни «Воину-интер­националисту»,  «От благодарного афганского народа» медалрин сагьибни  я. 1988-йисуз Ю.Къурбановаз  СССР-дин Верховный Советдин Прези­ди­ум­дин Гьуьрметдин грамота гана.

Къурбанов Юсуф къе жегьилрин насигьатчи, хуьре, районда тухузвай гзаф мярекатрин иштиракчи я.

Сократ Мустафин


Всего просмотров: 30

Читайте также: