Устад тебрикна!

11-октябрдиз Дербент шегьерда, Лезгийрин госмуздрамтеатрдин залда, Дагъустандин халкьдин артист, сегьнедин зурба устад, вич фадлай неинки лезгийриз, гьакI маса халкьарин тамашачийризни  айгьамринни хъуьруьнрин кIватI хьиз  машгьур хьанвай  Ибрамхалил  Рамазанович  Рамазанован  75, сегьнеда къугъваз 55 йис тамам хьуниз бахшзавай гурлу мярекат кьиле фена. Зал сиве-сивди сегьнедин искусстводал ашукьбуру ва юбилярдиз рикIивай гьуьрметзавайбуру ацIурнавай. 

РикIел  хкин:  Ибрамхалил Рамазановича вичин актервилин рехъ 1967-йисуз Сулейман-Стальский райондин автоклубда къуллугъчивилелай гатIунна. Анай Лезгийрин милли театрдиз атана ва вичин бажарагъ, алакьунар, руьгьдин мумкинвилер сегьнедин искусство вилик тухуниз бахшна. И рекье ам аквадай хьтин аршаривни агакьна: адаз 1990-йисуз “Дагъустандин лайихлу артист” лагьай (Бурдугудин роль тамамарунай), 1995-йисуз Дагъустандин Госпремия (“Шар­вили” эпосдин кьилин игитдин роль тамамарунай), 2000-йисуз “Да­гъустандин халкьдин артист” ла­гьай­ (“Гьажи Давуд” драмада император I Петрдин роль  тамамарунай)  гьуьрметдин тIвар, маса шабагьар гана. Сегьнедин “Гьамбал” чи руьгьдин “Пачагьдиз” элкъвена!

И кар мярекатда иштиракай ва тебрикдин гафар гваз рахай саки вирибуру къейдна. Юбиляр тебрикиз сегьнедал театрдин директор Динара Эминова ва кьилин режиссер Мирзебег Мирзебегов, РД-дин культурадин министрдин заместитель Мурад Гьажиев, зурба меценат, общественный деятель, “Дагюгстрой” ОАО-дин  генеральный директор Гьажи Ражабович Жабраилов, Сулейман-Стальский рай­ондин кьилин сад лагьай заместитель Лацис Оружев, “Лезги газетдин” редакциядин литературадин отделдин редактор, шаир ва публицист Мердали Жалилов, юбилярдин хайиди тир Курхуьряй атанвай еке десте мугьманар (хуьруьн кьил, муаллимар ва аялар), Азербайжандин государст­водин театрдин художественный ру­ководитель, лезги манидин сеслу билбил хьайи Дурия Рагьимовадин руш Эльза Рагьимова, Лезги театрдин саки вири артистар, Дербент ше­гьердин культурадин идарайрин ­векилар, юбилярдин ярар-дустар рахана.

Виридалайни кьилин кар ам хьана хьи, юбилярди,  сегьнеда вич къугъвай тамашайрай чIукар, вичин асас ролар мад сеферда тикрар хъувуналди, тамашачияр шадарна.

Чпин устадвал гьам сегьнеда къугъуналди, гьам юбилярдиз бахшнавай манияр лугьуналди, Да­гъустандин халкьдин артистри — Фаризат Зейналовади, Зарифа Къухмазовади, лайихлу артист Руслан Пирвердиева, жегьил артистри — Эльмира Къарахановади, Эмина Вагьабовади, Гуьлбес Элитмазо­вади, Сусанна Цмиевади, Фатима Фейзуллаевади, Рамик Рамаза­нова, ашукь Шемшира ва масабуру къалурна. Юбилярдив сегьнедал тамашачийрин ва мугьманрин ­патай хейлин къи­метлу пишкешар, цуькверин кIун­чIар, гурлудаказ ягъиз­ хьайи капар агакьна.

Эхирдай, РФ-дин лайихлу артист Абдул Гьабибова кьил кутуналди, театрдин артистри санал “Шарвилидин гимн” тамамарна. Залди, кIвачел акъвазна, капар яна…

Концертдин программа театрдин актриса Назира Агъасиевади устадвилелди кьиле тухвана.

Эминат  Загьирбегова


Всего просмотров: 54

Читайте также: