Уьмуьр – илимдиз

6-февралдиз чи машгьур алим (хуьруьн майишатдин илимрин кандидат), багъманчи,  Абдулгьалим  Гьуьзбуллагьович  Гьалимован  80 йисан юбилей къейдна, мубаракрай!

Ам 1938-йисан 6-февралдиз Ахцегьа къуллугъчидин хи­занда дидедиз хьана. Буба Гьуьзбуллагь гьа макъамда Са­­мур дереда машгьур мухбир, гуьгъуьнай “ЦIийи дуьнья” газетдин редактор тир. Ахцегьрин 1-нумрадин школа лап хъсан къиметралди куьтягьай­ ада 1960-йисуз Дагсельхоз­институт, ахпа аспирантура акьал­­тIарна ва производст­водин кIвалах вич рекье тур Астрахань областдин “Бузанский” совхоздин кьилин зоотехниквилин къуллугъдилай эгечIна. 1967-1976 -йисара гьана “Картубинский” чIехи сов­хоздин директорвал авуна. Производстводикай хкечI тавуна, 1975-йисуз агалкьунралди хуьруьн майишатдин илимрин кандидатвилин диссертация хвена.

1979-йисалай алимди Да­гъустандин хуьруьн майишатдин Фрид Гьасанович Кисриеван тIварунихъ галай илимдинни ахтармишунрин институтда (НИИСХ) кIвалахиз, илимдин адетдин къуллугъчидилай кар алай (ведущий) сотрудникдин, илимдин рекьяй директордин заместителдин, республикадин “Дагълар” программадин хилен заведующийвилин дережадиз хкаж хьана. А.Гьалимов гьакI Да­гъустандин НИИСХ-да республикада дагъдин мулкар-сер­гья­тар менфятлудаказ ишлемишунин рекьяй комплексный программадин (ФГБНУ) дестедин руководителни я. Дагъустандин шартIара хуьруьн майишат вилик тухунин гьакъиндай 245 илимдин кIва­лахдин, 70-далай артух гьар жуьре патентринни рационализатор­вилин проектрин автор (бязи теклифар производствода ишлемишунин нетижада экономикадиз 3 млн манатдилай ­артух менфят хьанва) тир адан зегьмет “Отличник изобретательства и рационализации СССР”, “РД-дин лайихлу изобретатель” сейли тIвара­ралди, гьакI “Зегьметда тафаватлу хьунай” (1966), “Зегьметдин ветеран” (1988) медалралдини Гьукуматдин дережадин гьуьрметдин грамотайралди къейднава.

Къе яшлу хьайилани илимдинни производстводин кIва­лахрал машгъул ва азад вахт акьалтзавай несил ватанпересвилин руьгьдаллаз тербияламишуниз серфзавай адаз чна  чандин сагъвал, мадни яргъи уьмуьр ва веледрикайни хтулрикай рикI динж хьун алхиш­зава.

Дашдемир ШЕРИФАЛИЕВ


Всего просмотров: 12

Читайте также: