Уьлкведин меркезда машгьур духтур

Илимдин чIехи кукIушар муь­тIуь­­гъарнавай машгьур лезгийрикай сад 1990-йисалай уьлкведин меркездин РАН-дин ИТЭБ-да кIва­лахзавай алим, медицинадин илимрин доктор, профессор  Бахрам  Исламович  Исламов  я.

Бахрам Исламован ери-бине КцIар райондин ТIигьиржалрин хуьряй я. Адан буба — Ватандин ЧIе­хи дяведин иштиракчи, диде эдебиятдин тарсар гузвай муаллим тир. Гележегдин алим хизандиз, дуствилиз, чIехи инсанриз гьуьрметунин адетралди тербияламиш хьана. Диде рагьметдиз фейидалай кьулухъ (а чIавуз Бахраман 15 йис тир) кьуд аял хуьнин, абуруз тербия гунин везифа текдиз дяведин инвалид  бубадин хиве гьатна. Ада веледриз гьамиша ихьтин насигьат гудай: “Эгер хъсанвал ийиз алакь­завачтIа, гьич тахьайтIа, зарар гумир”.

Б.Исламова 1973-йисуз Бакуда Азербайжандин Н.Нариманован тIварунихъ галай госмединститут та­фаватлудаказ куьтягьна. 1973-1974-йисара ада анестезиологиядин-реаниматологиядин рекьяй Бакудин медицинадин тежрибайрин НИИ-дин интернатурада кIелна. Гуьгъуьнлай медицинадин и хиляй Моск­вада А.Н. Бакулеван тIвару­нихъ­ галай рикIинни дамаррин хирургиядин институтда илимрин кандидатвилин ва докторвилин диссертацияр кхьена. Клиникадин тежрибада ишлемишдай, азарар тайинардай ва сагъардай дарманар кардик кутуна.

Бахрам Исламовича 1979-йисалай 1990-йисал кьван СССР-дин АН-дин биологический физикадин институтда кIвалахна. Алай вахтунда адан илимдин 135 кIва­лах чапдай акъатнава. Ам 2006-йи­суз Америкадин маш­гьур “EIse­vier” чапханада акъатай “BIood Substitutes” ктабдин кьилерикай садан автор я.

Илимдин рекье къазанмишнавай агалкьунар себеб яз лезги алим са жерге шабагьризни лайихлу хьана. Абурун жергеда РФ-дин Гьукуматди гайи премияни ава. Ам Россиядин лап хъсан духтуррин “Майилвал” сад лагьай милли премиядин сагьибни я.

Бахрам Исламован тIвар биофизикадин теориядин ва тежрибайрин институтдин алимрин советдин къарардалди “Россиядин лап хъсан ин­санар” энциклопедияда, Кэмбриджда авай международный биографический центрадин куьмекчи ктабда гьатнава.

ДатIана кIвалахдик квай пешекар ятIани, ада спортдал машгъул жедай вахтни жагъурзава. Гьар йисуз багъри ерийрал хквезва, дуста­рихъ, багърийрихъ галаз гуь­руьш­миш жезва.

Москвада яшамиш жезвай ватанэгьлидин хизанда пуд велед тербияламишзава. Чаз адан дере­жаяр мадни кьакьан хьана кIан­зава.

Куругъли Ферзалиев


Всего просмотров: 140

Читайте также: