Туризмдиз — кьетIен фикир

18-февралдиз РД-дин Гьукуматдин Председатель Артем Здунова Дагъустандин туриствилин маршрутар туькIуьрунин ва туризмдин къурулушар гатун сезондиз гьазурунин месэладай совещание кьиле тухвана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.

Республикадин туризмдин ва халкьдин художественный сеняткарвилерин ре­­кьяй министерстводи и барадай ту­хуз­вай­ кIва­лахдин гьакъиндай малумат ведомстводин руководитель Расул Ибра­гьи­­мова гана. Адан гафаралди, итижлу маршрутрин ва министерстводи 2019-йисуз кьиле тухудай лишанлу мярекатрин сиягь тайинарнава.

“Алай вахтунда а сиягьатдик республикадиз къвезвай мугьманрин ва чи агьалийрин арада иллаки машгьур тир 12 турмаршрут ва 2019-йисуз РД-дин лишанлу вакъиайрин туризмдин Милли календарда гьатнавай лишанлу вакъиаяр кутунва”, — малумарна докладчиди.

Артем Здунова мукьвал вахтара гьихь­тин мярекатар кьиле ту­хун фикирдиз къачунватIа, гьа кардин па­тахъай хабар кьуна. Суалдиз жаваб яз, ми­нистер­стводин руководителди малумарайвал, 20-23-февралдиз “Матласдин” тIебии чарчаррал муркIарилай хкаж хьунин рекьяй регионрин уртах хъуьтIуьн фес­ти­валь, мартдиз “Vizit Dagestan — 2019” лишандик кваз гастрономический туризмдин II Международный фестиваль кьиле тухуда. Санлай къачурла, календарда 150 серенжем гьатнава. Алатай йи­суз абурун кьадар 87-даз барабар тир.

Министрдин рахунриз баян гуналди, РД-дин Гьукуматдин Председателди къейд авурвал, туризмдин хилез неинки республикадин культура, гьакIни экономика вилик тухунин барадайни килигун герек я.

Артем Здунова муниципальный тешкилатрин руководителрин фикир турист­вилин навигациядин лишанар  эцигун чарасуз тирдал кьетIендаказ желбна. Ада и кIвалах йигинарун тапшурмишна.

“Чина гатун сезон” Россиядин центральный регионрив гекъигайла, кьве вацран фад башламиш жезвайди я. Апрелдизни майдиз чаз конкуренциядин барадай артуханвал аваз жеда”, — къейдна премьер-министрди, кIватI хьанвайбурун фикир менфятлудаказ кIвалахунал желб авуналди.

Темадай рахунар давамаруналди, Ра-сул Ибрагьимова  туризмдихъ галаз ала­къалу ва килигуниз лайихлу чкайрай вело­пробегар тешкилунин месэла вере­вирд­завайди, гьакIни региондин са жерге районра балкIанрал алаз фидайбурун цIийи маршрутар кардик кутуниз гьазурвал аквазвайди къейдна.

Министрдин фикирдалди, итижлу турмаршрутра  туризмдин  рекьяй талукь чкаяр, санлай гзаф кьадар инсанри ял ядай, лишанлу мярекатар кьиле тухудай чкаяр тешкилуни кьетIен роль къугъвазва, анра туриствилин навигациядин, автомобилар акъвазардай чкайрин лишанар эцигун, хуьрек недай чкаяр, санитарный кIвалер тадаракламишун, патарив гвай  чкайрани къулай шартIар тешкилун герек я.

Совещанидал рекьерихъ ва транспортдихъ галаз алакъалу месэлайризни килигна. ИкI докладчиди вич кьиле авай ми-нистерстводин бинедаллаз туриствилин автостанция кардик кутун теклифна.

Месэла веревирд авунин сергьятра аваз пляжар аваданламишунин  чарасузвиликайни ихтилат кватна. Районрин ва ше­гьеррин кьилерихъ элкъвена, Премь­ер-министрди лагьана: “Чна пляжрал михьивал ва къайда хуьн таъминарунин пата­хъай­ кIевивалда. И зонайра бизнес вилик тухуниз сифте нубатда куьне итиж авун герек я. Маса уьлквейра муниципальный пляжар лап хъсан гьалда ава, вучиз­ ла­гьай­тIа пляжрин къерехра кьилдин ксарин объектар бинеламиш хьанва. Чи республикада лагьайтIа,  гьуьлуькай менфят­ къачузва, пляжар авай гьалдиз лагьай­тIа, лазим тир фикир гузвач”.

РД-дин архитектурадин ва шегьерра эцигунар кьиле тухунин рекьяй Комитет­дин­ председатель Незир Гьуьсейнова къе­­не­па­тан ва къецепатан туризм вилик тухунин ба­радай авай мумкинвилерикай суьгьбетна. Туризмдин месэлаяр экономикадихъ га­лаз алакъалу авуналди, ада и барадай ре­гион­дихъ авай мумкинвилерикай тамам дережада менфят къачун тийизвайди къейдна.

Вичин рахунар давамаруналди, Незир Гьуьсейнова малумарайвал, туризм вилик­ тухун патал  лазим тир мулкар фикирдиз желбдайбуруз элкъуьрунихъ еке метлеб ава. Идахъ галаз алакъалу яз ада, маса ре­гионрилай ва уьлквейрилай  чешне къачуналди, Дагъустандин туриствилин ярж  арадал гъуниз эвер гана.

Докладчи санлай гзаф кьадар агьалийри ял язавай  зонаяр, пляжар, туризмдин кар алай чкаяр архитектурадин жи­гьет­дай хъсандиз дуьзмишунин месэладални акъвазна. ИкI, туриствилин асул мар­шрутар сезонрихъ галаз алакъалу тирди фикирда кьуналди, ада  алачухрин архитектура кардик кутунни теклифна.

“Муниципалитетрихъ галаз сих ала­къа­яр хуьн лазим я, вучиз лагьайтIа абуруз  чпин мулкарал туристрин фикир иллаки желбзавай чкаяр гьибур ятIа, амайбурулай хъсандиз чизвайди я. Жуван патай чна абуруз туризмдин къурулушар гегьеншдаказ кардик кутаз куьмекда”, — лагьана Незир Гьуьсейнова.

Къуллугъ авунин ери хкажунин месэладикай рахуналди, республикадин комитетдин председателди къейдна: “Чина ту­ристдин фикир желбдай, адаз таъсирдай­ чкаяр авач. Идахъ галаз алакъалу яз ада флэшмобар тешкилун, ядигарар яз гьисабиз жедай шейэр маса гудай чкаяр, килигдай майданар, аттракционар, кафеяр тешкилун меслят къалурна.

Совещанидин нетижаяр кьуналди, Артем Здунова лагьана: “Алай вахтунда чун туризмдин къурулушар вилик тухунал машгъул хьун герек я. Вахт алукьайла, яржарни пайда жеда. Алай йисуз чна туристриз рекьерин къерехра авай чкайра къуллугъ авуниз, пляжриз талукь яз конкурс малумарда”.

Премьер-министрди и месэлайрив мукьуфдивди эгечIун, сифте нубатда инсанриз къулайвилер тешкилуникай фикирун лазим тирди къейдна. Идалайни гъейри ада виридалайни хъсандиз аваданламишнавай паркар ва скверар тайинарун патал конкурс кьиле тухудайдан гьакъиндайни малумарна. Артем Здунова вири и месэла­яр и ва я маса муниципалитетдиз зиян хкIан­ тийидайвал гьялун лазим тирди къейдна.

“Сада-садан тежриба чира. Дагъустанда  ял ягъунин дережа  лап виниз тирди хьун герек я. Къецепатан уьлквейрай тир операторрихъ, къулайвилер тешкилиз ала­кь­завайбурухъ галаз алакъаяр тайинара. Инвестор яз вуж желб ийиз жедатIа, гьадан­ патахъайни фикир ая. Ида туристриз къуллугъ авунин дережа лап виниз хкаждай мумкинвал гуда”, — малумарна А.Здунова­.

Эхирдай ада туризмдинни сиягьатрин маршрутрин сетдин кIвалах мадни хъсанарунин барадай тапшуругъар гана.

Совещанида са жерге министерствойрин, ведомствойрин руководителри, муниципалитетрин кьилери, регионрин туроператорри иштиракна.

«Лезги газет»


Всего просмотров: 206

Читайте также: