ЦипицIар кIватI хъийизва

21-августдиз Сулейман-Стальский райондин кьил Нариман Абдулмуталибов алай вахтунда ципицIар кIватI хъувунин кIвалахар кьиле физвай ципицIлухрин «Гуьлгери вацI» майишатда хьана.

«Лезги газетдиз» райадминистрациядин пресс-къуллугъди хабар гузвайвал, тIвар кьунвай майишатдихъ ципицIар гьасилунин рекьяй хъсан тежриба ава ва ам вилик жергеда авайбурукай сад я. Санлай къачурла, «Гуьлгери-вацI» ООО-дихъ ципицIар битмишарзавай 172 гектар чил ава. Кьилди къачуртIа, ципицIлухда «Молдова», «Савеньон», «Первенец Магарача», «Агадаи», «Августин», «Шарданэ» ва маса сортар битмишарзава.

Райондин кьили майишатдин регьбердихъ ва зегьметкешрихъ галаз ихтилатарна, абурун къайгъуйрикай, арадал къвезвай четин месэлайрикай хабарар кьуна. ЦипицIлухдин майишатдин кьиле акъвазнавай Р.Кичибегова къейд авурвал, бегьер кIватI хъувунин кIвалахар пландин бинедаллаз кьиле физва. Малум хьайивал, са гектардай 100 центнер бегьер жеда, им, къейдзавайвал, хъсан нетижа я. Санлай къачурла, и майишатда 1500 тондив агакьна ципицIар кIватI хъийида. Алай вахтунда бегьер кIватI хъувунал 120 зегьметкешди кIвалахзава. Абуруз чпин гьар йикъан гьакъини (агъзур манатдилай агъзурни вад виш манатдив агакьна) гузва.

Райондин кьили майишатдин кIвалахдиз вини дережадин къимет гана, кIвалахда агалкьунар ва бегьер кIватIна акьалтIарун патал гьавадин хъсан шартIар хьун алхишна.

«Лезги газет»


Всего просмотров: 42

Читайте также: