ЦIийи мектебрин гьисабдай

“Образование” милли проектдин сергьятра аваз 19 школа эцигуни Дагъустанда  тарсар пуд сменада гунал эхир эцигдай мумкинвал яратмишда”, — малумарна Кеферпатан Кавказдин крарин рекьяй РФ-дин министр С.Чеботарева республика яшайишдинни экономикадин жигьетдай вилик тухунин месэлайрай кьиле фейи совещанидал.  Региондин гьукуматди раиж авур делилралди, чарасуз герек объектар 2021-йисалди эцигда. Идан гьакъиндай ТАСС-ди хабар гузва.

“Образование” милли проект бажармишун патал республикадиз 8,8 миллиард манат чара ийизва. Идакай 7,6 миллиард манат тарсар пуд сменада тухунал эхир эцигунин мурадар патал серфда. И кар патал  лагьайтIа,  19 имарат кардик кутун герек къведа”, — лагьана министрди.

Дагъустанда 1642 школа кардик ква. Анра саки 400 агъзурдалай гзаф аялри  чирвилер къачузва. Идакайни 2,6 агъзурдалай гзаф школьникри пуд лагьай сменада кIелзава. Совещанидал Да­гъустандин Гьукуматдин сад лагьай ви­це-премьер Гьажимегьамед Гьуьсейнова малумарайвал, школаяр 2021-йисалди эцигда — 8 школа Хасавюрт районда, 5 — Махачкъалада, 2 — ЦIу­ма­да районда, Докъузпара ва Ахцегь районра  — гьарна сад.

Республикадин гьукуматди раиж авур делилралди, чирвилер гудай идараяр регионда «Демография» милли проектдин сергьятра авазни эцигда, милли кьве проект кьилиз акъудун патал, санлай къачурла, 15,5 миллиард манатдилай виниз такьатар чара ийида. Дагъустанда школайрилай гъейри аялрин 50-далай виниз бахчаярни кардик кутада.

«Лезги газет»


Всего просмотров: 23

Читайте также: