ЦIийи хъийизва

“Лезги газетдиз” РД-дин здравоохраненидин министерстводин пресс-къуллугъди хабар гайивал, Дагъустандив “Тади куьмекдин” цIийи 40 улакь агакьнава. Абурукай 8 реанимациядин отделенидиз талукь тадаракралди таъминарнавай реанимобилар я. Амайбур —  адетдин “Тади куьмекдин” улакьар.

Министерстводин пресс-къуллугъдин делилралди, мукьвара республикадив алава 60 улакь мад агакьда. Йисан эхирдалди лагьайтIа, региондин медицинадин идарайрив, санлай къачурла, “Тади куьмекдин” цIийи 108 улакь агакьдайвал я.

Къейд ийин хьи, абур Дагъустандин бюджетдай чара авунвай такьатрихъ маса къачунва. Республикадив ихьтин кьадарда аваз “Тади куьмекдин” улакьар агакь тийиз гзаф йисар тир. РД-дин здравоохраненидин министр Жамалудин Гьажиибрагьимован гафаралди, республикадин “Тади куьмекдин” улакьрин парк тайин  пландин бинедаллаз цIийи хъийизва. ЦIийибур маса къачунин нетижада районра авай куьгьне хьанвай улакьар арадай акъуддай мумкинвал жезва.

“Кьилин везифа Дагъустандин гьар са пипIе яшамиш жезвай агьалийрив, герек хьайила, медицинадин рекьяй ерилу куьмек вахтунда агакьарун я. ЦIийи улакьар маса къачунин макьсадни гьа им я”, — лугьузва министрди.

Чи мухбир


Всего просмотров: 24

Читайте также: