ЦIи Ахцегьа 19-сеферда “Шарвили” сувар кьиле фида

Кьасумхуьрел “Сулейман-Стальский район” МР-дин кьил Нариман Абдулмуталибован регьбервилик кваз Лезги халкьдин игитвилин “Шарвили” эпосдин сувар къейд авунин тешкиллувилин комитетдин заседание кьиле фена.

Лугьун лазим я хьи, цIи сувар 19-сеферда кьиле тухуда ва гьар йисуз адак иштиракзавай инсанрин, дестейрин, коллективрин кьадарни артух жезва.

Мярекатдал райондин администрациядин культурадин отделдин начальник Майрудин Бабаханова “Шарвили” эпосдин суварихъ галаз алакъалу яз ту­худай серенжемрин гьа­къин­дай малумат гана.

Ада лагьайвал, суварин юкъуз, адет тир­вал­, районрин майданри кIвалахда. Лезги халкь­дин сеняткарвилерал машгъул устIарри чпин устадвал къалурда. “Шарвили – 2018” ши­килрин выставка тешкилда. Музыкадин, спортдин устадриз чпин алакьунар къалурдай мумкинвал гуда. Суварик къвезвай иштиракчийриз “Шарвилидин” эмблема алай шапкаяр ва значо­кар багъишда. Суварихъ галаз алакъалу чкайра­ куьчеяр пайдахралди, лозунгралди, баннерралди, транспорантралди безетмишда. Чкадин газетри ва телеканалри сувариз талукь чинар, передачаяр гьазурда, элкъвей столар теш­килда­.

Суварин сергьятра аваз “Шарвили” эпосдай чIукар хуралай кIелдайбурун, шикилар чIуг­вадайбурун, эпосдин игитдиз талукь нинияр ийидайбурун, лезги ва урус чIалал сочиненияр кхьидайбурун конкурсар тешкилда, спортдин серенжемар кьиле тухуда.

Талукь месэладин гьакъиндай чпин фикирар райадминистрациядин кьилин заместитель Лацис Оружева, общественный советдин председатель  Алимет Мейланова, образованидин управленидин начальник Къачабег Аминова, райондин информагентстводин регьбер Жабраил Асланова ва масабуру лагьана.

Н.Абдулмуталибова талукь ксарал лап хъсан спортсменрин, культурадин, искусстводин ва илимдин, общественно-политический деятелрин арадай “Шарвили” эпосдин премияр гудай ксар теклифун тапшурмишна. Культурадин отделдин начальникдиз суварик ачухзавай “Райондин майданда” иштиракзавай ксарал алукIдай парталрин гьакъиндай къайгъу чIугун буйругъна.

– И сувари чи халкьдин тарихар дуьздал акъудзава, – лагьана Н.Абдулмуталибова. – “Шар­­вили” тек лезги халкьдин ваъ, вири да­гъус­танвийрин милли сувар я. Адан бинеда Ва­тан кIан хьунин, халкьдиз рикIин михьивилелди­ къул­лугъ авунин, дустариз вафалу хьунин ерияр ава.  Эпосди халкьдин итижар хуьзвай игитдихъ ватанпересвилин зурба руьгь авайдан гьа­къиндай шагьидвалзава. Йис-сандавай “Шарвили” сувари вичин сергьятар, майданар гегьен­шарзава ва адахъ чун патал еке метлеб ава.

“Лезги газет”


Всего просмотров: 127

Читайте также: