ТIвар тебрикна

“Лезги газетди” хабар гайивал, эдебият вилик тухунин лайихлувилерай ва яргъал йисарин бегьерлу зегьметдай Кичибег Мусаевич Мусаеваз “Дагъустан Республикадин халкьдин шаир” лагьай тlвар ганва.

И йикъара шаирдин хайи Гилийрин хуьруьн мектебда, мугьманризни эвер гана, мярекат кьиле тухвана. Анал Кичибег Мусаеван уьмуьрдин ва яратмишунрин рекьикай Р.Керимханова суьгьбетна. Шаирди школани, ДГУ-дин филологиядин факультетни, СССР-дин илимрин Академиядин Вири дуьньядин эдебиятдин институт лап хъсан ­къи­метралди акьалтlарна. Гилийрин хуьряй  акъатай ам сад лагьай алим я. Сифте ада муаллимвиле,ахпа лезги радиодин редакторвиле, яргъал йисара Азербайжандин Низамидин тlварунихъ галай институтда кlвалахна. 2003-йисалай шаир Дербентда яшамиш жезва ва ада анин писателрин кlватlал­диз регьбервал гузва.

Гуьруьшдал республикадин махсус школа-интернатдин директордин заместитель А.Саи­дов, хуьруьн администрациядин кьил А.Мегьамедов, мектебдин директор Д.Пирмегьамедова, муаллим Б.Османова рахана. Абуру шаирдиз ганвай лайихлу тlвар тебрикна,чандин сагъвал ва вичин рекье мадни еке агалкьунар хьана кlанза­вай­ди лагьа­на. Абуру гьакI Гилийрин хуьруьн школа халкьдин шаир К.Мусаеван тlвар­цlихъ ягъу­нин теклиф хушвилелди кьабулна.

Шад мярекатдал мектебдин аялри шаирдин шиирар кlелна, гъвечlи концертни гана.

Эхирдай Кичибег Мусаева вич икI тебрик авунай кlватl хьанвайбуруз сагърай лагьана.

Алалдин Саидов


Всего просмотров: 61

Читайте также: