Тимур Иванов — Дагъустанда

“Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, 19-майдиз Дагъустандиз Урусатдин оборонадин министрдин заместитель Тимур Иванов мугьман хьана. Ина ам республикадин Кьил Владимир Васильевахъ галаз гуьруьшмиш хьана.

Гуьруьшдин вахтунда абуру Урусатдин Президент Владимир Путинан буйругъдалди Дагъустанда коронавирус акатнавайбур кьабулдай инфекцийрин центр эцигунин месэла веревирдна.

Къейд ийин хьи, республикада авай чIавуз Тимур Иванов  РД-дин Гьукуматдин Председатель Артем Здуновахъ галаз санал гележегдин госпиталдин дараматар эцигдай мулкариз килигна. Къейд ийин хьи, госпиталь Махачкъала шегьердин Хушет поселокдин, Каспийск шегьердин кьилин больницадин ва республикадин хамунинни венерический азарин диспансердин мулкарал эцигун фикирдиз къачунва. Идалай гъейри, медицинадин центрадин дараматар акьалтIай куьруь муьгьлетда хкаждайвал я.

Центр Урусатдин оборонадин министерстводин типовой проектдал бинеламиш хьана туькIуьрда. Ам диагностикадин тадаракралди, компьютердин томографралди, инфекцийрин азарар квани, квачни тайинариз куьмекдай ПЦР-модулдин лабораторийралди ва маса аппаратралди таъминардайвал я.

Владимир Васильевахъ галаз кьиле фейи гуьруьшдал Тимур Иванова хабар гайивал, министерстводихъ ихьтин центраяр эцигунин жигьетдай тежрибани ава. Адан гафаралди, Дагъустанда эцигзавай хьтин центр уьлкведин 16 регионда кардик кутунва.

Республикадин Кьили центр ахъаюнин тереф хвена. Адан гафаралди, медицинадин цIийи идаради агьалияр сагъарунин ва абурув хъсан еридин куьмек агакьарунин кардик чIехи пай кутада­.

Гуьруьшдин вахтунда В.Васильев ва Т.Иванов мад цIийи цен­трада кIвалахун патал республикадиз медицинадин алава къуллугъчияр желб авуниз, оборонадин министерстводи республикадин мулкарал хкажзавай объектар эцигна акьалтIаруниз талукь месэлайризни килигна.

“Лезги газет”


Всего просмотров: 51
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире