ТIимил жезва

Дагъустандин здравоохраненидин министерстводи игьтияж аваз хьайитIа, коронавирус акатнавайбур патал алава койкаяр кардик кутунин месэла гьар йикъан гуьзчивилик кутунва. И йикъара РД-дин здравоохраненидин министр Жамалудин Гьажиибрагьимова хабар гайивал, алай вахтунда республикада, санлай къачурла, тIегъуьн акатнавайбур сагъар хъувун патал 3230 койка кардик кутунва. Абурукай 2180 азадбур я.

Лагьана кIанда, республикада тIегъуьн акатзавайбурун кьадар гьар юкъуз артух жезвай чIавуз азарлубур патал Дагъустанда 9 агъзурни 200 койка гьазурнавай.

Министрдин гафаралди, республикада коронавирусдихъ галаз алакъалу гьалар къвердавай хъсан жезва. Азарлубур кьабулун патал инфекцийрин отделенияр арадал гъайи са жерге азарханаяр адетдин къайдада кIвалахунив эгечI хъийизва. Эгер виликдай коронавирус акатнавайбур Дагъустандин медицинадин 69 идаради кьабулзавайтIа, къенин юкъуз и кардал Махачкъала шегьердин клиникадин азархана, республикадин инфекцийрин азаррин центр ва шегьерринни районрин кьилин азарханаяр желбнава.

Жамалудин Гьажиибрагьимова къейд авурвал, коронавирус акатзавайбурун кьадар республикада йикъалай-къуз тIимил жезва­. Гьа са вахтунда азарлу жезвайбурулай сагъ хъжезвайбурун кьадар пара я. Министрди гьисабзавайвал, гьалар хъсан патахъ дегиш­ жезватIани, агьалийри духтуррин, пешекаррин меслятрал амал авун давамарна кIанда. Гьелелиг коронавирус михьиз терг хьанвач­.

Агьмед  Магьмудов


Всего просмотров: 70
Подпишитесь на наши каналы:

Читайте также:


Новости партнеров