Мегьамед Ибрагьимов

ТIегъуьндин есирда

Кьилин редактордин гаф

Играми газет кIелзавай­бур!  Алай вахтунда вири ­инсаният чIехи завалдин хата­лувилик акатнава. Корона­вирус лугьудай тIегъуьндихъ ин­саф авач: саки гьар юкъуз жуьреба-жуьре уьлквейра цIуд­­рал­ди инсанар адан къурбандар жезва. Ам акатай инсанар ­са­гъар хъийидай дарманар акъуд­за­ва­тIани, гегьенш къатариз чукIун тавурай лугьуз, уьлквейри сергьятар агалзаватIани, агъзурралди инсанар кIвалера чуьнуьх жезватIани, хейлин маса серенжемарни кьабулзаватIани, ­гьелелиг инсаният и тIегъуьндин есирдай акъатнавач.

Лагьана кIанда, Китайдилай, 3 агъзурдалай гзаф инсанар телеф хьанатIани, тIегъуьндин вилик­ пад кьаз алакьна. Амма тамамдиз ваъ. Гьелелиг ада вичикай и уькведани хабар хгузва. АкьалтIай пис гьалар Европада арадал атанва. Италиядивай­, Испаниядивай, Германиядивай, Франциядивай ва са жерге маса уьлквейривай коронавирусдин гьужумриз дурум гуз жезвач. Америкада лагьайтIа, адан къурбандрин кьадар 3400-лай алатнава.

Пешекаррин меслятрихъ яб акалайтIа, инсандихъ, тайин тир къайдайрал амал авуртIа, коронавирусдин винел гъалибвал къачудай мумкинвал ава. Сифте нубатда, маса инсанрихъ галаз алакъа тахьуниз кьетIен фикир гана кIанзава. Инсандиз вичик тIегъуьн акатнавайдакай сифтегьан 10 йи­къан­ къене хабар тахьун мумкин я. Духтуррин гафа­ралди, гзаф дуьшуьшра инсандик коронавирус акат­навайди гьафтедилай гзаф вахт алатайла винел акъатзава. Гзаф кьадар инсанар кIватI жезвай чкайриз фин хаталу я. Жезмай кьван кIвале ацу­кьай­тIа хъсан я. Амма ара-ара хелвет чкада (кIва­ле­рихъ галай сала, багъда) михьи гьавадал экъе­чIун герек я. Мукьвал-мукьвал гъилер чуьхуьх, чуь­хуьн тавунвай гъилер чинивай гуьцIмир. Игьтияж аваз куьчедиз экъечIна, туьквендиз фена кIан­заватIа, чинал махсус маска алукI. Гаф кватай чкадал къейд ийин хьи, чи республикада са шумуд югъ идалай вилик маскайрин кьитвал авай. Къе-пака и месэла гьялна акьалтIардайвал я. Маса регионрай гъунилай гъейри, маскаяр чкадални гьазурзава. Маскаяр квевайни гьар садавай жунадикай кIвалин шартIарани гьазуриз жеда.

Коронавирус себеб яз дуьньядин ериш дегиш хьун мумкин я. Урусатда хьиз, хейлин маса уьлквейрани гзаф кьадар карханайрин кIвалах вахтуналди акъвазарнава, экономика яваш камаралди вилик физва, къецепатан уьлквейра авай ватанэгьлийривай хайи чилел хквез жезвач, инсанар телеф жезва… И сиягь мадни давамариз жеда.

Шукур хьурай Аллагьдиз, и жигьетдай чи уьлкведа авай гьалар са акьван писбур туш. Президентди, субъектрин кьилевайбуру коронавирусдин сергьятар гегьенш хьуниз акси серенжемар кьабулзава. Гзаф чкайра хьиз, Дагъустандани образованидин, культурадин идарайри, гзаф кьадар карханайри вахтуналди кIвалахзавач. Республикадин кьилевайбуру агьалийриз кIвалерай экъечI тавуниз, гигиенадин къайдайрал амал авуниз эвер гузва. Дагъустандин азарханаяр кьетIен гьалара кIвалахунал элячIнава.

ТIегъуьнди чи редакциядин кIвалахдин къурулушдани дегишвилер тунва. Гзаф чкайра хьиз, чна­ни кье­тIен гьалара кIвалахзава. 31-мартдиз РД-дин информатизациядин, алакъадин ва массовый коммуникацийрин министрди республикада акъатзавай газетрин, журналрин редакторрихъ галаз совещание кьиле тухвана. Адан сергьятра аваз газетар, журналар чапдай акъудуниз, абур кIелзавай­бурал ахгакьаруниз талукь месэлаяр веревирдна. “Дагпечать” ГАУ-дин директор Юсуп Хайдакьова хабар гайивал, республикада са жерге киоскрин кIвалах вахтуналди акъвазарнава. Почтадин отде­ленийри гьелелиг виликдай хьиз кIвалахзава. Республикада газетар чапдай акъудун давамарда­.

Вири Аллагьдин гъиле ава. Пакадин югъ гьихьтинди жедатIа анжах Адаз чида. Анжах ам бахтлу­ди, экуьди хьун тайин тир кьадарда чалайни аслу я. Ша чна вирида духтурри, пешекарри къалурзавай меслятрал амал ийин, Халикьдивай чун таквадай баладикай, дуьшуьшдикай хуьн тIалабин.

Мегьамед  Ибрагьимов


Всего просмотров: 137
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире