ТIебиатдив къадирлувилелди эгечIун патал

Акьалтзавай несилдиз тIебиатдив ва чан алай вири затIарив къадирлувилелди эгечIунин тербия гунин мураддалди, Сулейман-Стальский райондин Алкьвадрин хуьруьн ктабханада «Экология – аялрин вилерай» лишандик кваз, 5-классда кIелзавай аялрин иштираквал авай экологиядин мярекат кьиле фена. Идакай «Лезги газетдиз» райондин администрациядин пресс-къуллугъди хабар гузва.

Ктабханадин заведующий Лаура Шабановади элкъуьрна кьунвай тIебиат хуьнин темадай аялрихъ галаз маналу суьгьбет кьиле тухвана. Аялриз инсанди тIебиатдиз гьихьтин таъсир ийизватIа, тIебиат, адан ресурсар гьикI хуьдатIа ва и кар патал вуч авун лазим ятIа чир хьана.

Ктабханадин къуллугъчиди тIебиатда авай гьар са набататдихъни гьайвандихъ вичин кьетIенвилер, гуьрчегвилер ва менфятлувилер авайдакай, абур чеб-чпихъ галаз алакъалу тирдакай лагьана.

Мярекатдин вахтунда дарманар ийидай набататриз талукь суалар авай конкурсни кьиле тухвана. Мярекат тIебиат хуьникай, адан гуьрчегвиликай шаирри кхьенвай шиирар кIелуналди акьалтIна.

«Лезги газет»


Всего просмотров: 15

Читайте также: