Суварин мярекат

4-октябрдиз Дербент райондин администрациядин актовый залда Муаллимрин югъ — пешекарвилин сувар  къейд­завай мярекат шаддаказ кьиле фе­на.   Ана тежрибалу яшлу ва гьакIни жегьил муаллимри, школайрин ва аялрин бахчайрин руководителри, райондин кьилин везифаяр тамамарзавай Фуад Шихиева, заместителар тир Икрам Бабетова, Садир Эмиргьамзаева, райсобранидин председатель Мажмутдин Семедова, общест­венный палатадин председатель Фе­тул­ла Фетуллаева, образованидин  работникрин профсоюздин председатель Диляра Алиевади ва масабуру иштиракна. 

Мярекат башламишдалди суварин иштиракчияр администрациядин вилик Белиждин ва Мамедкъаладин яратмишунрин кlвалерин аялри гьазурнавай кlва­лахрин выставкадиз килигна.

Кlватl хьанвайбуруз сувар тебрик аву­налди, мярекат ачухай Фуад Шихиева лагьана:

— Муаллим виридалайни гьуьрметзавай пеше я. Заз инал райондин образованидин хиле кlвалахзавай вири пешекарриз акьалтзавай несилдиз тербия ва чирвилер гун патал чlугвазвай зегьметдай сагърай лугьуз кlанзава. Образованидин хиле,  куь алакьунриз килигна, чи район республикада хъсан чкадал ала… Къуй квехъ мадни еке агалкьу­нар хьурай!

Муаллимриз сувар гьакlни Икрам Бабетова, Фетулла Фетуллаева, Диляра Алиевади ва масабуруни мубаракна.

Мярекат тухузвайда сегьнедиз жегьил муаллимризни абурун насигьатчийриз теклифна. Тежрибалу муаллимри и пеше хкянавай жегьилриз хуш келимаяр лагьана ва абурув зегьметда къазанмишай агалкьунар кхьидай лишанлувилин ктаб вугана.

Райондин образование вилик тухуник еке пай кутур, виликдай образованидин управленидин начальниквиле кlвалахай РД-дин лайихлу муаллим Муьгьуьдин Къагьриманован рахунар  кlватl хьанвайбуру капар ягъуналди кьабулна. Ада алай йисуз юбилеяр къейдзавай, залда ацукьнавай яшлу муаллимриз сувар тебрикна­.

Ахпа аялри юбилеяр къейдзавай яшлу муаллимрив цуькверин кlунчlар ва пишке­шар, Ф. Шихиева, М. Семедова ва Д. Алиевади са десте муаллимрив гьукуматдин наградаяр, райондин администрациядин ва профсоюзрин патай грамотаяр вахкана.

Эхирдай жаван артистризни гурлу капар яна.

Къагьриман Ибрагьимов

 


Всего просмотров: 37

Читайте также: