Суал-жаваб

“Гьуьрметлу редакция! Квез чар кхьизвайди Сулейман-Стальский райондин Кьасумхуьрелай тир Алибегова Эмина я. За ДГУ-да 1-курсуна кIелзава. Заз кьилел хуьдай кас (буба) алачиз амукьунай гузвай пенсия и мукьвара акъвазарнава. ТIалабзава и месэладай кьил акъудун. Кьилел хуьдай кас  алачиз амукьунай, аялди эгер очнидаказ кIелиз хьайитIа, пенсия 23 йис жедалди гун лазим тушни?

Мадни са суал ава: чпихъ кIелзамай аялар галамай  пенсионерар тир диде-бубайриз пенсиядал алава пул гьихьтин дуьшуьшра ва гьикьван вахтунда гузва?”

Редакциядин  патай:

Куь суалдиз жаваб гун патал чна Россиядин Пенсийрин фондунин отделенидин (ОПФР) Дагъустанда авай управленидиз чар рекье тунвай. Агъадихъ чна анай хтай жаваб гузва: “Пенсия къачузвай аялри чеб кIелдай идарадик экечIнавайдакай Дагъустандин Пенсийрин фондуниз хабар гун лазим я. Инал кьилел хуь­дай­ кас алачиз амукьай, 18 йис тамам хьанвай­, чпи кьилин ва юкьван пешекарвилин образование къачудай идарада очнидаказ кIелзавай аялрикай ихтилат физва. Ахьтин аялри кIелунин цIийи йисан сифте кьиляй са сеферда справка гъун бес я. Пенсия 23 йис тамам жедалди гуда”.

Кьвед лагьай суалдиз талукь яз респуб­ли­кадин Пенсийрин фондунай ихьтин жаваб хтана­:

“Чпин нафакьадал яшар 18 йисалай алатнавай студентар алай пенсионерар тир диде-бубайриз страховой пенсиядал алава яз гузвай тайинарнавай дережадин пуларин (фиксированная выплата) кьадар артухариз жеда. А пулар артухарнавай къайдада гун патал пенсионердин нафакьадал яшар 18 йисав агакь тавунвай, зегьметдиз къабил тушир аялар ва я тахьайтIа яшар 18 йисалай алатнавай, чирвилер гудай идарада очнидаказ кIел­завай аялар алаз хьун герек я. И пул а аялдин 23 йис тамам­ жедалди гуда. Тайинарнавай дережадин пулар артухарнавай кьадарда гун патал республикадин Пенсийрин фондуниз аялди кIелзавай идарадай справка агакьарун, аялдин 18 йис тамам хьайила лагьай­тIа, ам нафакьадал алайди тестикьарзавай документар агакьарун лазим я. Ахьтин документрин жергедик саналди яшамиш жезвайвилин гьакъиндай справка, кьилди яшамиш жезвай дуьшуьшда нафакьадал алай касдин хийирдиз харжияр авунвайди тестикьарзавай документар акатзава.

Очный отделенидай акъудай, кIелна куь­тя­гьай­ ва я студентдин яшар 23 йисав агакьай дуьшуьшра пенсия гун акъвазарда, дидедиз ва я бу­бадиз (гьакIни кьведазни) гузвай тайинарнавай дережадин пуларин кьадарни тIимиларда. Идахъ галаз алакъалу яз очный жуьреда кIелу­ни­лай заочнидаказ кIелунал элячI­навайдан ва я кIелун акъвазарнавайдан гьакъиндай Дагъустандин Пенсийрин фонд вахтунда хабардар авун герек я. ТахьайтIа, къачунвай артухан пулар хкьа­да­”.


Всего просмотров: 46

Читайте также: