СтIал Сулейманакай — лезги шаирри

Мани

Сулеймана лагьай чIалар

Шалбуз дагъ хьиз винева.

ЧIехи шаир, халкьдин дамах,

Вун гьамиша рикIева.

 

Камаллу тир ви гьар са чIал

Чи рикIера авазва.

А девирдиз авур айгьам

Къенин юкъуз аквазва.

 

Ви къапудиз кьецI гузавай

Гьар са алчах терг хьурай.

Вуна кхьей чIаларикай

Душман чIухдай верг хьурай.

Пакизат Рагьимханова

 

Сулейманаз

Сулейман дах, ваз кьве девир акуна­,

Сад лагьайда ви чан, жигер кайид я.

Къуьне гьебе, хурал чуьнгуьр, саз кьуна,

На халкьариз шадвални бахт гъайид я.

 

Дидедин нек ваз тухдалди жагъа­нач­,

Шек аял яз, вун фахъ къекъвез гьат хьана.

Дербентдани, Генжедани Бакуда.

Ваз гьахъсузвал, залумкарвал акуна.

 

Фекьиярни, судуярни кавхаяр,

Сифте кхьей шиирралди на кана.

Кесибарин иви  хъвазвай залумар

Халкьдин кимел, азгъунар яз, на гъана.

 

Октябрдин инкъилабдин нурари,

Кесиб синиф ишигълаван авуна.

Сулейман дах, ви гьахълу тир чIалари

ЦIийи дуьнья ашкъидалди кьабулна.­

 

Ви шииррин жавагьир тир чIалари

Фяле, лежбер, пайдахар хьиз, хкажна.­

Винел патай чIулав канаб тир абур,

Къене патай ипек тирди къалурна…

Рамазан Велибегов

 

 Кьве дуст

Сад Сулейман кьакьан Кавказ дагъларай,

Ван хкажай шаир Совет властдин.

Сад Жамбул, Азиядин яргъарай,

Ван хкажай акын хци алмасдин.

Абур кьве кас хьанай эвел кьилерин,

Векилар яз зегьметчи тир эллерин!

 

Кьве шаирни эвел кьиляй кесиб яз,

Са шад тир югъ акун тавур ксар тир.

Совет власть кьисметдай хьиз несиб яз,

Гьукум цIийи тестикь хьайи йисар тир,

Билбил хьана гатфар акур Сулейман,

Жамбулазни жагъана рикIин дарман!

 

Чеб чпивай яргъал тиртIан мензилриз,

Кьведанни сад тир мурадар, хиялар.

Руьгьламишиз, азиятар кьезилриз,

Кьведазни хуш тир советрин аялар.

Сулеймана багъишна чан ватандиз,

Жамбулани гьуьрметна гьар инсандиз!

 

Чан аламаз акуначтIан сад-садаз,

РикIяй-рикIиз рекьер авай шаиррин.

Залум ажал кьисмет хьана фад садаз,

ЦIарар амаз аламатдин загьиррин.

Сулеймана, рикIел алаз дуст Жамбул,

Вири дердер авунай вичел кьабул!

Сажидин


Всего просмотров: 17

Читайте также: