Спортдин мастервилин  тIвар къачуна

Мукьвара Санкт-Петербургда самбодай Вирироссиядин мастервилин турнир кьиле фена. Ана уьлкведин жуьреба-жуьре субъектрай атанвай 120 спортсменди иштиракна.

Турнирда 82 килограммдин заланвиляй вичин ери-бине Кьасумхуьрелай тир, Санкт-Петербургдин военный физический культурадин институтдин 5-курсунин студент Ибрагьим  Къурбанов майдандиз экъечIна. Вад касдин винел инанмишвилелди гъалибвал къачур чи ватандашди тур­нирда 1-чка кьуна ва РФ-дин спортдин мастервилин тIвар къачуна.

Къейд ийин хьи, Ибрагьим Кьасумхуьруьн 2-нумрадин юкьван школада кIелзавай йисара райондин самбодинни дзюдодин ДЮСШ-да спортдал рикIивай машгъул хьана. Ада Дагъустан Республикадин кIвенкIвечивал патал самбодай тухвай акъажунра — 1, СКФО-дин чемпионатда 3-чкаяр кьуна.

Санкт-Петербургда ада вичин устадвал тежрибалу тренер, 2 сеферда дуьньядин чемпион Сергей Кирюхинан гъилик хкажзава. Ибрагьим Санкт-Петербург шегьердин, Ленинградский областдин чемпион, Вирироссиядин гзаф турниррин гъалибчи ва призер я.

Алава хъийин хьи, Ибрагьим чемпионрин тухумдай я. ИкI, адан дах Юрий — самбодайни дзюдодай спортдин мастер, имияр тир Рамазан ва Тельман пешекаррин арада дуьньядин чемпионар, чIехи стха Аслан жуьреба-жуьре  женгерай 4 сеферда дуьньядин чемпион я. Аквазвайвал, Ибрагьима тухумдин кар уьзягъдаказ давамарзава.

РФ-дин спортдин мастервилин тIвар мубарак авуналди, чаз Ибрагьим Къурбановахъ спортдин рекье мадни еке агалкьунар хьана кIанзава.

Хазран Кьасумов


Всего просмотров: 208
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире