Сократ Гьажиеван тIварунихъ галай турнир

И йикъара Докъузпара райондин ЦIийи Къаракуьре хуьруьн ДЮСШ-да, Афгъанистанда интернациональный буржи тамамардайла игитвилелди телеф хьайи усугъчайви, Яру Гъед ордендин сагьиб Сократ Гьажиевич Гьажиев рикIел хкуниз талукьарна, волейболдай районрин уртах турнир кьиле фена.

Турнирда Докъузпара, Ахцегь ва Рутул районрай 2001-йисуз дидедиз хьайи ва адалайни жегьил волейболистрикай ибарат ругуд командади иштиракна.

Акъажунрив эгечIдалди вилик До­къузпара райондин кьилин заместитель Салигь Гьажимурадова, райондин спортдин, жегьилрин сиясатдин ва туризм­дин отделдин начальник Агъашериф Агъа­ширинова  спортсменрихъ турнирда ­агалкьунар хьана кIанзавайди алхишзавай ­келимаяр лагьана, ЦIийи йис мубаракна.

Жегьил волейболистар акъажунриз хъсандиз гьазур хьанвай. Турнирда Рутул райондин командади – 1, Докъузпарадин командади  – 2, ахцегьвийрин командадини 3-чкаяр кьуна. Гъалибчийриз кубокар, медалар, пишкешар ва пулдин премияр гана.

Сократ Гьажиеван къамат рикIел хкуниз талукьарнавай турнир Докъузпарада гьар йисуз кьиле тухузва. Акъажунрин эхирдай Агъашериф Агъаширинова иштиракчийриз, мугьманриз, гьакIни районда спорт вилик тухуник чпин кьетIен пай кутазвай Гьажиеврин хизандизни чухсагъул малумарна.

Куругъли Къалажухви


Всего просмотров: 23

Читайте также: