Сив хуьнин сувар мубаракрай!

Играми мусурман стхаярни вахар!

Квез Сив хуьнин сувар рикIин сидкьидай мубаракрай!

Мусурманар патал и суварихъ еке метлеб ава. ГьикI лагьайтIа, гьадисри шагьидвалзавайвал, Рамазандин вацра сивер хвейи инсанар руьгьдин жигьетдай михьи жезва, рикIин сидкьидай дуьаяр авур, тIалабай ксарин гунагьрилай Сад Аллагьди гъил къачузва.

Абу Хурайради агакьарайвал, Пайгъамбарди (с.а.с.) лагьаналда: «Ни Рамазандин вацра рикIин сидкьидай иман гваз ва Аллагьдин патай сувабар агакьуник умуд кваз сив хвенатIа, адан виликан вири гунагьрилай гъил къачуда» (Аль-Бухари ва Муслим). И келимайри винидихъ къейднавай гьакъикъат нубатдин сеферда тестикьарзава.

Я Аллагь, Рамазандин вацра гьар са мусурманди кьур сивер, гайи садакьаяр, авур дуьаяр Вуна кьабула. Я Ребби, гьар камунал гьахъсузвилерни инсафсузвилер дуьшуьш жезвай и дуьньяда Вуна чун гьарамдикайни гунагьдикай хуьх. Чи рикIера сабурлувал, мергьямат, захавал артухара. Чун ви регьимдик кутур, я Ребби.

Гьуьрметлу мусурман стхаярни вахар. Къуй чи дуьаяр Аллагьди кьабулрай! Амин. КIвалера – берекат, рикIера – иман, мецерал Аллагьдин тIвар хьурай. ТакIанвилер тахьурай, шад жедай крар пара хьурай!

Чаз квехъ чандин сагъвал, бахтлувал, агалкьунар хьана кIанзава. Къуй гьар са къадамда чаз Аллагьдикай куьмек хьурай! Амин!

«Лезги газет»


Всего просмотров: 50

Читайте также: