Сих алакъада аваз

Дербентда Низами Генжевидин парк аваданламишунин чIехи кIвалахар гъиле кьунва. Абурал, культурадин ирсиниз талукь  хилен законодательстводал асаслу яз, РАН-дин ДФИЦ-дин археологри гуьзчивалзава. Идан гьакъиндай шегьердин администрациядин пресс-къуллугъди хабар гузва.

Паркуна винидихъ тIвар кьунвай кIвала­хар кьиле тухудай чIавуз юкьван асиррин сурарал эцигнавай къванцин  гуьмбетар  жа­гъана. Археологри ахьтин гуьмбетрин къванер жагъанвай чкайра тухузвай кIвала­хар кьведра акъвазарна, идан гьакъиндай РД-дин культурадин ирс хуьнин рекьяй агентство хабардарна. Ихьтин дуьшуьшра накьвадин кIва­ла­хар гуьмбетрин къванериз талукь яз серенже­мар кьабулдалди маса участокра тухуз хьа­на. Эцигунардайбуруни археологри дегь девиррин сурариз хасаратвал хьунин вилик пад кьунин мураддалди сих алакъада аваз кIва­лахзава. Къейд авун лазим я хьи, къадим заманайрин гьич са сурузни хасаратвал ганач. Мумкин тир сурар абурал эцигзавай гуьмбетрилай хейлин деринда ава.

Дербентдин администрациядин кьилин заместитель Заур Эминова хабар гайивал,  Низами Генжевидин тIварунихъ галай парк аваданламишунин кIвалахар вири патари­хъай веревирднавай ва вичиз государстводин экспертизади рази жедай къимет ганвай проектдин бинедаллаз кьиле тухузва.

Адан гафаралди, проектдик культурадин ирсинин имаратар саламатдиз хуьниз талукь махсус разделни ква. Идалайни гъейри, архео­логиядин кIвалахар кьиле тухун патал махсусдаказ ихтияр къачунва. Паркуна археологиядин кIвалахар государстводин талукь тир органрин гуьзчивилик кваз кьиле тухунин патахъай икьрарни кутIуннава.

“Шегьердин администрацияди агьалияр ва туристар патал къулай шартIар яратмишунин барадай тухузвай серенжемри культурадин ирсинин имаратрин саламатвилиз къурху тагун — им чун патал акьал­тIай важиб­лу месэла я”, — малумарна Заур Эминова.

«Лезги газет»


Всего просмотров: 61
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире