Шарвилидин суварин къаршидиз

Вил вегьейтIа дегь заманрин тарихриз,

Лезгияр туьнт ксар хьанвай къилихриз.

Вуч затI ятIа залан кIвалах, азият,

Кьулухъ чIугваз квачирбур тир хасият.

Дагълар тирвал суьруьйралди лапагар,

Гьар са хуьруьхъ вичин нехир, рамагар.

Аран пата никIер бул тир техилрин,

Акур чIавуз, рикI пад жедай пехилрин.

Кьакьан дагълар, абуземзем булахар,

Чи лезгийрин тамамбур тир кIвалахар.

 

Эхиз женни лезги, дарги дуст хьана?

Ахвар къвенни дагъви халкьар суст хьана?

Къумлухравай татар, мугъул Чингисхан,

Чапхунчияр атана гьар хуьруьз хан.

Буьркьуь ийиз муьтIуьгъ тахьай Меликар,

Йигарар ийиз халкь кьуьлуькай,

Ифир ийиз сухайтIани жидаяр,

Къванциз элкъвез хьана игит гадаяр,

КьецIи Тимур, Надир шагьни атана,

Эхир катна, рекьидалди гатана.

 

Элдин кьиле акъвазайла Шарвили,

Мад чи рикIер куз амукьнач тIарвили.

Къуба, Самур, Куьре, табасаранвияр,

Яхул, къумукь, аварарни даргияр;

Самур, Терек вацIар, кьведни агудиз,

Женг чIугунай, вагьши Надир акъудиз.

Шарвилидкай КIеледин са дагъ хьана,

Женгер чIугваз, хьайи хирер сагъ хьана.

Халкьдин рикIе Шарвилидин тIвар ама,

Чанар гана, ватан хуьдай кар ама!

 

Ислягь чIавуз сагъар хъийиз хирерни,

КIватIал ийиз хьана куьлуь хуьрерни.

Къуба, Хачмаз, КцIар, Ахцегь, Рутулар,

Куьре, Гияр кIватIал хьана хтулар,

Табасаран Яхул шегьер, Гунибар,

Къимет патал жез кIан хьанай сагьибар.

Турпагъ къеле, Дербент, Нарын-къеледин,

Къати женгер хьайид туш гьар-гьилледин.

Каспидин гьуьл чи гьунаррин шагьид я,

Шагь дагъ, Шалбуз чаз пайдахар хьайид я.

 

Лезги халкьди хвена чпин адетар,

Са стхаяр кьаз гьар жуьре миллетар.

ЧIални хвена, кIвални хвена, намусни,

ТIварар хвена гайи вацIуз, кIамузни.

Нез-хъваз герек, гьар са хуьрек, кьелни кваз,

Дуьнья машгьур Лезгийрин туьнт кьуьлни кваз.

Мел-мехъерни халкь кIватI хьана ийидай,

Дараматар куьмек гана хъийидай.

Сад жедайвал лагьай гафар, крарни,

Шаддиз къаршиламишиз ярарни!

 

КуькIуьр ийиз азадвилин чирагъар,

Ярагъиди халкь авуна къарагъар.

Имам Къази-Мегьамедар, Шамилар,

Гъазаватдал авун патал таъминар;

Шейх Жамалдин, Мирзе Гьасан, Саидар,

Лигимарна, гьулданар хьиз, игитар.

Эминани Сулеймана, Тагьира,

Шиирралди мягькемзава чи ара.

Игитри хьиз, къуллугъ ийиз ватандиз,

ЭкъечIзава чи жегьилар майдандиз.

 

Гьа девирар рикIел хкиз эллерин,

Къалур ийиз чешне игитвилерин;

Лал хьун патал чал пехил тир вагьшияр,

КIватIалзава яргъал, мукьвал къуншияр.

Лезги халкьди, хуьз гьуьрметдив тарихар,

Къалурзава лезгийриз хас къилихар.

Шарвилидиз тик хивелай КIеледин

Парудив къвез, къадим Ахцегь къеледин.

Дуствал чириз, дустар галаз лезгияр,

Кьуьлерзава, лугьуз шад яз манияр.

 

Гьар са йисуз Шарвилидин ватанда

Сувар тухур къастар ава чи чанда.

Дагъустандай, Урусатдин шегьеррай,

НикIер, багълар ацIудай хьиз бегьеррай;

Манийрин ван кикIидайвал цавари

“Лезгинкадал” кьуьл ийида суварик.

Регьберризни буюр ийиз шадвилик,

Виридан пай кутаз тада садвилик.

Авазва чахъ шадвал ийиз давамар,

Османарни Нариманар, Имамар!

Сажидин, шаир


Всего просмотров: 35

Читайте также: