ШартIар хъсанарда

28-июлдиз  Дагъустандин Кьил Владимир Васильев ва РФ-дин экономикадин жигьетдай вилик финин министрдин сад лагьай заместитель Михаил Бабич Каспийский флотилия Дагъустандиз ахкъудунин сергьятра аваз эцигзавай имаратриз килигна. Идалай гуьгъуьниз гьа и месэладиз ва РФ-дин Президентди кьабулай къарардихъ галаз алакъалу яз Каспийскдин яшайишдин ва коммунальный къурулушрин объектар авай гьал хъсанарунин рекьяй ала­ва яз вилик акъвазнавай везифайриз талукь совещание тух­вана.­

Каспийский флотилия бинеламишнавай чкадин сергьятра аваз мугьманар аскервилин къуллугъчийрин яшайишдин гьаларихъ галаз таниш хьана, абур гьакIни гьуьлуьн  гужлу лепейрикай хуьн патал туькIуьрнавай гидротехнический имаратдиз  килигна.

Гьа ина, кьушунрин частунин мулкунал, совещание кьиле тухвана. Михаил Бабича федеральный центр Дагъустандиз алава куьмек гуз гьазур тирди къейдна.

“Квехъ галаз санал чун аскервилин къуллугъчияр патал вири къулайвилер авай яшайишдин кIвалер эцигунин кIвалахар кьиле физвай гьалдихъ галаз таниш хьана, яшайишдин  девирдин истемишунриз жаваб гузвай къурулушар арадал гъизва, Дагъустандин здравоохраненидин системадин ихтиярдиз РФ-дин оборонадин министерстводи алай аямдин госпиталь вахканва. Идалай гъейри, РФ-дин оборонадин министерстводин  эцигунар кьиле тухудай­ кьилин военный управлениди РФ-дин Президентдин тапшуругъдалди республикадин мулкунал, санлай къачурла, 13 миллиард манатдин къимет авай яшайишдин 74 объект эцигзава. И кардай РФ-дин оборонадин министерстводиз мад сеферда сагърай лугьуз кIанза­ва. Каспийскдиз талукь яз лагьайтIа, РФ-дин Государстводин Кьили ва Гьукуматдин руководителди гьам аскервилин къуллугъчийрин, гьам гражданвилин агьа­лийрин итижар патал яшайишдин метлеб авай имаратар — школаяр, аял­рин бахчаяр ва икI мад — эцигунин кIвалахрик зарб кутун таъминарун тапшурмишнава. Гьялна кIанзавай месэлаяр аваз хьайи­тIа, бюджет арадал гъидай чIавуз абур вилив хуьда”, — хиве кьуна Михаил Бабича.

Дагъустандин Кьили къейд авурвал, и месэла республикадин парламентдин гуьзчивилик ква. И мукьвара РФ-дин оборонадин министр­дин заместитель Тимур Иванов РД-дин Халкьдин Собранидин депутатрихъ галаз гуьруьшмиш хьун лазим тир. Амма эпидемиологиядин жигьетдай арадал атай гьалар фикирда кьуна, месэла видеоконференцалакъадин къайдада веревирдна.

“Чун тамам дережадин гуьруьш гьар гьикI авуртIани кьиле тухунин патахъай икьрардал атанва. Чна а гуьруьш мукьвал тир вахтара кьиле финик умуд кутазва.  Идалайни гъейри, чир хьун лазим я хьи, вири жуьрейрин къулайвилер авай, лазим тир яшайишдин техникадалдини таъминарнавай яшайишдин кIвалера са квадратный метрдин майдан Каспийский флотилиядин къуллугъчияр патал анжах 46 агъзур манатдай акъвазда. РФ-дин Президентди фло­тилия Дагъустандиз ахкъудуни инсанриз, гьам аскервилин къуллугъчийриз, гьамни чкадин агьалийриз талукь яшайишдин коммунальный къурулушар хъсан хьунал гъунин везифа вилик эцигнава. И тапшуругъдин бинедаллаз чна школаяр, аялрин бахчаяр ва яслияр хъсан ериш аваз эцигзава”, — къейдна Владимир Васильева.

РД-дин эцигунрин ва ЖКХ-дин министр Малик Баглиева вичин нубатдай къейд авурвал, санлай 13 миллиард манатдин къимет авай и 74 объект Дагъустандин пудратчийри эцигзава. КIвалах чкадин агьалийрин къуватралди тамамарзава ва налогарни чкадин бюджетдиз къвезва. Эцигунардай материаларни республикада маса къачузва. Флотилия бинеламиш хьунихъ галаз алакъалу яз Каспийскдин яша­йишдин къурулушар пайгардик хьун таъминарун патал чна, 6048 чкадин 9 школа, 1370 чкадин аялрин 6 бахча ва яслияр, гьакIни аялар патал тайинарнавай медицинадин идара  вири санлай 5,5 миллиард манатдилай виниз къимет авай 16 имарат эцигнава ва кIвала­хар давамарзава. Идалайни  гъейри, къе куьн мугьман хьайи аскеррин кIвалер авай городокда Россиядин оборонадин министерстводи  1224 чкадин школа эцигунин къарар кьабулна. КIвала­хар алай йисуз гъиле кьада, имарат къведай йисуз ишлемишиз вахкуда”, — малумарна министрди.

М.Баглиев коммунальный хилен месэлайрални акъвазна, ше­гьер­ бинедилай 40 агъзур кас агьалияр яша­миш хьун патал тайинарнавайди тирди, алай вахтунда ла­гьайтIа, Кас­пийскдин агьалийрин кьадар 100 агъзур касдилай алатнавайди, Каспийский флотилия бинеламиш хьайидалай гуьгъуьниз агьалийрин кьадар мадни 40 агъзур касдин артух же­дайди къейдна. “Республикадин бюджетдин такьатрин гьисабдай микрорайонар михьи целди таъминарунин рекьяй проектдинни сметадин документация туькIуьрзава. Идалайни гъейри, ишлемишдай ятар михьи хъийидай имаратрин кьвед лагьай пай кардик кутун, абуру гьялзавай цин кьадар суткада 30 агъзур кубометрдилай 60 агъзур кубометрдив агакьдайвал артухарун лазим я. Идалайни гъейри, вичяй Каспийскдиз яд гъизвай вир михьи авун, шегьердин махсус сетрин насосрин станцияр  кардик кутун ва авайбур цIийикIа туь­кIуьр хъувун, Махачкъала-Каспийск-Избербаш водовод кардик кутунин кIвалахар акьалтIа­рун герек я”, — лагьана Малик Баглиева.

«Лезги газет»


Всего просмотров: 45
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире