ШартIар дегишарнава

Декабрдин эхиррай РД-дин хуьруьн майишатдин ва недай суьр­сетдин министерстводин дараматда  “Дагагроснаб”  АО-дин директоррин советдин заседание хьанай.

Анал компанияди 2018-йисан вахтунда тамамарай кIвалахрин нетижаяр кьуна ва РД-дин хуьруьн майишат вилик тухуниз та­лукь  государстводин программадин сергьятра аваз республикадин бюджетдай лизингдихъ галаз алакъалу кIвалахриз чара  ийиз­вай “Дагагроснаб” АО-дин уставной капиталдик акатзавай такьатар ишлемишдай къайдадик дегишвилер кухтуна.

Директоррин советдин фикирдалди, кухтунвай дегишвилери республикадин агропромышленный комплексдин зегьметчияр патал лизинг (кредит гунин къайдайрикай сад ва я  эменни кирида къачун) тIем акакьдайди авун лазим я.

Кьилди къачуртIа, 2019-йисалай республикадин лизинг анжах АПК-дин хилериз талукь жеда. Хуьруьн ма­йишатдин вич-вичиз фидай техника маса къачун патал  кутIунза­вай икьраррин вахт – 8 йисалай, прицепдин ва навесные машинар патал 5 йисалай  тIи­милди хьун лазим туш. Комбайнияр патал лизингдай гузвай пуларин арада жедай вахт 6 вацралди давамарда. Идалайни гъейри,  ли­зингдай гана кIанзавай гьакъи вахтунда тагайла, илитIзавай жермейрин ва винел хквезвай пуларин кьадар 1 процентдилай 0,04 процентдал кьван агъузарнава.

Мадни  башкъа,  декабрдин вацра РД-дин экономикадин ва мулкар виликди тухунин министерстводин, “Дагагроснаб” АО-дин ва республикадин МФЦ-дин арадани пуд терефдин икьрар кутIун­нава.

Адан бинедаллаз, гила хуьруьн майишатдин техника ва тадаракар маса къачун патал арза республикадин МФЦ-дин гьи филиал­­диз хьайитIани гуз жеда. Финансрихъ галаз алакъалу арендадин­ (лизинг) икьрар кьилдин карчийривай,  карханайривай ва я адетдин агьалийривай кутIуниз жеда.

“Зи документар” центрайра  гила гьам республикадин, гьамни федеральный ва алишверишдин лизингдин арзаяр туькIуьрдай мумкинвал ава. Савдадин нетижада агьалийривай комбайн,  трактор, махсус ва автотехника, гьакIни ял ягъун ва туризм патал лазим­ техника маса къачуз жедайвал я. И рекьяй чирвилер  къачунвай МФЦ-рин пешекарри  агьалийривай арзаяр кьабулиз башламишнава. “Дагагроснаб” АО-дин техника ва тадаракар лизингдай маса къачунин шартIарикай тамамдаказ идарадин www.dagagrosnab.ru сайтда кхьенва.

Къайда асантди хьанва

Россиядин Гьукуматди багъларин чкайра  эцигнавай кIвалер  яшайишдинбур яз кьабулунин,  талукь яз, дачайра прописка авунин къайда са кьадар асантди авунва.

Гьукуматдин сайтда чапнавай къарарда къейднавайвал,  багъларин чкайра   иесийри анра йисан кьиляй-кьилиз  яшамиш хьун патал кIвалер эцигзавай дуьшуьшар къвердавай гзаф жезва. Икьван чIавалди ихьтин кIвалера регистрация авун къадагъа тир.

Къарар 2019-йисан 1-январдилай къуватда гьатзавай закондихъ галаз алакъалу яз кьабулнава. И законди дачайрин чкайра эцигнавай дараматар яшайишдин кIвалер яз гьисабдай ихтияр гузва.  Талукь яз, россиявийриз чеб яшамиш жезвай чкайра прописка ийидай ихтияр ганва.

Гила багъдин чкада эцигнавай кIвал яшайишдинди яз  чкадин самоуправленидин органди арзадин ва вуганвай документрин бинедаллаз, махсус комиссиядин ихтияр къачун тавуна, кьабулун лазим я, къейднава Гьукуматдин сайтда.

97,1 % ерилубур я

2018-йисуз республикада  санлай къачурла  22,4 агъзур тонн тумар цана. Россельхозцентрадин  Дагъустандин филиалди хабар гузвайвал,  ахтармишнавай кьадардикай 97,1 процент тумар ерилубур (кондицияда авайбур) яз хьана.

Идарадин пресс-къуллугъди хабар гузвайвал,  алатай йисан 2 ва 3 лагьай кварталра  государстводин тапшуругъдин сергьятра аваз идарадин пешекарри 10100 гектар майданра цанвай  хуьруьн майишатдин культурайрин ери ахтармишна ва регистрация авунва­.

И кIвалах республикадин 14 райондин 40 майишатда  (гьа жергедай яз Сулейман-Стальский, Дербент, Казбек, Леваша, Сергокъа­ла  ва икI мад)  кьилиз акъуднава.

Зулуз цанвай магьсулар ахтармишай  никIерин майданар 4 агъзурни 961 гектардиз, гатфаринбур – 1 агъзурни 730 гектардиз барабар хьана, зулун магьсулар регистрация авунвай  майданри 1 агъзурни 774 гектар, гатфарин – 1 агъзурни 635 гектар теш­кил­зава­.

Чи мухбир


Всего просмотров: 27

Читайте также: