ШартIар арадал гъизва

Сулейман-Стальский районда 2018-2022-йисарин вахтунда алай аямдин шегьердин шартIар тешкилунин гьакъиндай проект уьмуьрдиз кечирмишун давам жезва. Мукьвара райондин кьил Нариман Абдулмуталибова, райадминистрациядин кьилин заместителри, ЦIийи Макьарин, Испикрин, Кьулан СтIалрин  ДаркIуш-Къазмайрин,  Герейханован хуьрерин кьилери, райадминистрациядин къурулушрин руководителри и проектдин сергьятра аваз тухудай кIвалахар веревирдна, абур Кьулан СтIалдал, Испика паркарин зонаяр ва ЦIийи Макьарин хуьре “Дидедин памятникни” галаз паркунин зона арадал гъунин дизайн-проектрихъ ва тухун лазим тир кIвалахрин планрихъ галаз таниш хьана.

— Гъиле кьунвай проект уьмуьрдиз кечирмишун яз, районда яшайишдин ва культурадин са шумуд объект дуьзмишдай мумкинвал гана, — лагьана Н.Абдулмуталибова. — Ида агьалийрин яшайиш патал къулайвилер яратмишзава.

Паркарин зонаяр дуьзмишун патал Кьулан СтIалдал — 2,6 га, ЦIийи Макьа — 0,27 га, Испика 0,8 га чил чара авунва. И чкаяр аваданламишунин пландик эквер гъун, жугъунралди кIевирун, цуьквер ва кул-кусар, къацуз амукьдай векь цун, къелемар акIурун, скамейкаяр, урнаяр эцигун, инсанар къекъведай гуьтIуь рекьер, тротуарар цIийи хъувун, велосипедар гьалдай рекьер дуьзмишун, спортдин ва аялрин майданар туь­кIуьрун ва ихьтин маса кIвалахар ква.

Нариман Абдулмуталибова къейд авурвал, и проектриз общественный организацийрин векилрин ва хуьрерин агьалийрин иштираквални аваз килигда, веревирд ийида. Проект уьмуьрдиз кечирмишун патал райондин ва хуьрерин “рекьерин картайрик” ва бюджетдик дегишвилер кухтун, объектар эцигзавай мулкарин инвентаризация тухун, дуьзмишзавай мулкарин проектдинни сметадин документар туькIуьрун, инвесторар желб авун ва электронный майданрал экъечIун лазим я.

Къейд авун лазим я хьи, къведай йисуз Дар­кIуш-Къазмайрал паркунин зона дуьзми-шун ва 60 аялдиз чкаяр авай ясли-бахча эцигун федеральный бюджетдик кутада. И рекьерай пулдин такьатралди куьмек гудай меценатни хуьре ава. Эцигунрин проект гьазурнава. Гила амайди ахтармишунар тухун я.

Винидихъ рахай месэла райадминистрацияда веревирд авурдалай гуьгъуьниз Н.Абдулмуталибов ва жавабдар маса ксар ЦIийи Ма­кьарал фена, дизайн-проект чкадал уьмуьр­диз кечирмишунин мумкинвилериз килигна.

Чи мухбир


Всего просмотров: 26

Читайте также: