Шаирдин тIвар дуьнья кьван я!.. (II пай)

Макъаладин сад лагьай пай и ссылкадай кIелиз жеда.

Халкьарин гьуьрметар

Советрин писателрин Сад лагьай съезддал авур рахунри (кIелай шиирри) Сулейман ХХ асирдин Гомер тирди субутна. И тIвар адаз пролетаррин писатель Алексей Максимович Горькийди гана. Сулеймановедри къейд­завайвал, адакай кьван къиметлу келимаяр лагьанвай мад гьич са шаирни, гьикаятчини дуь­ньяда авач. Идан шагьидвал шаирдин 100 йисаз талукь яз 1969-йисуз, Москвада, Кремлдин колонный залда кьиле тухвай зурба мярекатрини ийиз­­ва. А вахтара ахьтин мярекатар а залда лап зурба векилриз тешкилзавай. Адан ктабрин тиражар Дагъус­тан­дин халкьарин кьадардилай алатзава!

ЧIехи Россияда Сулейманан тIвар Москвадилай гуьгъуьниз маса шегьерра-Волгоградда, Элистада, Кисловодск­да, Пятигорскда, Владикавказда (Орджоникидзе шегьер), Новороссийскда, Владивостокда, масанра машгьур я.

Виринра адан тIварунихъ янавай куьчеяр, культурадин идараяр, гимияр, кIвалер ава.

Волгоград шегьерда, Ватандин ЧIехи дяведин къурбандриз Мамаеван тепедал хкажнавай мемориалдин цла шаирдин хва Мусаибан тIварни къизилдин гьарфаралди атIан­ва. Мусаиб ина 1942-йисуз телеф хьана.

Кисловодск, Пятигорск, Ор­д­жоникидзе, Элиста ше­гьер­ра шаирди неинки ял яна, курортра вичин сагъламвал мягькемарна, гьакI анра тешкилай хейлин мярекатра (совещанийра, съездра, гуьруьшра) ишти­рак­на. Абурукай шаирди лап метлеблу эсерарни теснифнава.

Новороссийск шегьерда Ватандин ЧIехи дяведин залан йисара кана амукьай чи танкарай шаирдин ктабар жагъай чкадал адан тIвар алай куьче хьанва. Сулейманаз кьетIен гьуьрметар гьана ийизва.

Пятигорск шегьерда шаирдин дуст ва секретарь хьайи писатель Эффенди Капиева “Шаир” ктаб кхьейдини рикIел хуьн кутугнава. Ана хейлин йисара Сулеймана Гьабибаз (Эффенди Капиеваз) багъишай лезги чуьнгуьрни хвена.

Эффендидин уьмуьрдин юлдаш Наталья Капиевади а чуьнгуьр, 60 йисан юбилей къейддайла, Расул Гьамзатоваз багъишна. 2002-йисан 18-майдиз  — СтIал Сулейман хайи юкъуз а чуьнгуьр Расула Агъа СтIалдал хкана, шаирдин музейдиз вахкана. Ихьтин савкьат шаирдин гъиле хьун лазим я, ам нив вугудатIа, лезгийри — Сулейманан ирссагьибри чпи хкягъун лазим я лагьанай…

“Сулейманан чуьнгуьр” шиир авар чIалай урус чIалан куьмекдалди за таржума авуна. Рагьметлу Ибадуллагь Гьа­жимирзоевич Тагьирован теклифдалди. А эсер чи антологийра гьатнава.

Россиядилай къеце СтIал Сулейманан тIвар, винидихъ лагьанвайвал, Азербайжанда, Гуржистанда, Туьркменистанда, Узбекистанда, Къазахстанда машгьур я. Ибурал Украина, Белоруссия, Молдавия, Эрменистан, Германия, маса уьлквеярни алава хъжезва. Виринра шаирдин эсерар гьа халкьарин чIаларалди чап авунихъ галаз сад хьиз, хейлин чкайра шаирдин тIвару­нихъ куьчеяр, идараяр янава, адан юбилеяр къейдзава. Къазахстанда дагъдин са кукIуш­дал Сулейманан тIвар  ала.

Ингье гьикьван чIехи ва  му­ракаб карта (географиядин ва тарихдин) чи чIехи арифдардихъ, камалэгьлидихъ ава­­­­тIа! Ам чируни, ихьтин карта-схема туькIуьруни, клубра, библиотекайра, мектебра ам аквадай чкадал хуьни чи несилар халисан ватандашвилин руьгьдаллаз тербияламишда. Зун художник туш. Ха­лисан художникри ихьтин карта туькIуьруник, ам чапдай акъудуник зи умуд ква.

* * *

Шаирдин тIвар дуьнья кьван я, дуьнья кьван!

Кесер вуч я адан руьгьдихъ  авай кьван!

Материкар кIвачел адан къарагъда!

Океанри гьайбат адан сурагъда!

 

Ажеб ава адан чIала верцIивал!

Алмасривай къачуна жед хцивал!

Гьар са гаф я са къаш цIарцIе заргардин!

Саз рахада акьван сеслуз, азгардиз!..

 

Дуьнья тирвал къекъвезва сес шаирдин.

Лезги Гомер — сад я акьван магьирди!

Юбилейрай юбилейрихъ фида чун!

Ви гьамгади — ви чIала мерд хуьда­ чун!..

14.05.19

Мердали Жалилов


Всего просмотров: 26

Читайте также: