Шаирдин гуьгьуьл къачуна

СтIал  Мислимат  (Агьмедпашаева Мислимат)  —  и тIвар ван та­хьай,  ам чин тийидай кас Лезгистанда бажагьат ава. Зун адахъ галаз “Мислимат хала” лугьуз рахазва. Ма­сакIа лугьун кутугнавач. Ам за жуван дидедай, чIехи вахай, чIехи насигьатчидай, тербиячидай кьунва эхир. Мислимат Агьмедпашаева фадлай инихъ вичин тIвар инсанрин арада машгьур хьанвай, уьмуьрдин уькIуь-цуру акунвай ва абур халкьдал шиирралди агакьарзавай бажарагъ авай шаир я.  Чна шаирвилин сирерни адавай чирзава. Ам а сирерин гъавурдани дериндай ава, масадбурни абурун гьавурда тваз, герек чкадал меслятар къалуризни гьазур я…

Малум тирвал, СтIал Мислиматан са шумуд ктаб чапдай акъатнава. Лезги шииратдал рикI алайбуру абур кIелзава, менфят­ къачузва, къимет гузва. Ам шаиррин хизандин диде я — вичин веледрилай алатайла, хтулри, птулрини адан  рехъ давамарзава. Им, шаксуз, шадвалдай кар я…

ТIебиатдихъ вичин къанунар ава, инсан яшлу, такьатсуз жеда. Им тIебии кар я. Мислимат халани яшлуни, кефсузни хьанва. Амма ада дарихвалзавач, руьгьдай ават­навач, кьатIунрай зайиф хьанвач. Ам фадлай такунвайвиляй зун шаирдин патав гуьгьуьл къачуз, лу­гьудайвал, кьил чIугваз, кIвализ фена. Шукур хьурай Сад Аллагьдиз, адан сагъламвилин къаравулда духтурар, свас, хтулар акъвазнава. ЭрчIи гъиле куьмекчи асани кьуна, хъуьрез-хъуьрез къаншардиз атай ада чун шаддиз къаршиламишна. Хваш-беш, жузунар-ка­чузунар,  их­тилатар авуна. Вич ри­кIел атунай, гуьгьуьл къачунай  адаз кьадар авачир кьван шад хьанвай. Эхиримжи вахтара вичи кхьенвай шииррикайни кIелна ада… Яшлу инсан чна яргъалди бизарнач. Шаирдиз мукьвара къейд­навай вичин 95 йисан юбилейни тебрикна чна. Чир хьайивал, Россиядин Президент В.Путинани адаз хайи югъ-баркаллу юби­лей­ тебрикзавай чар рекье тунвай. Чи мурад Мислимат халадин сагъламвал мягькем ва хизанда хушбахтвал мадни артух хьун я.

Райсудин  Набиев,

муаллим, зегьметдин ветеран


Всего просмотров: 71

Читайте также: