Шаир Гьуьсейн Рамазан рагьметдиз фена

И йикъара чав Кьурагь райондин Ашарин хуьряй чIулав хабар агакьна: гъилевай йисуз, сентябрдиз, вичин 80 йис тамам хьун вилив хуьзвай устад муаллим,  гьа районда лезги  писателрин Союздин отделенидин кьиле хьайи шаир, мухбир, манидар, гьевескар композитор Гьуьсейн Мегьамедович Рамазанов рагьметдиз фена.

Гь.М.Рамазанов 1938-йисуз дидедиз хьана, хуьре юкьван школа, ахпа ДГУ-дин филфак куьтягьна, саки 60 йисуз хуьруьн школада жегьил несилриз лезги ва урус чIаларай, литературайрай дерин чирвилер гана, халис ватанпересар яз тербияламишна,  аялрик яратмишдай руьгь кутуна.

Ашарин юкьван школада аялрин яратмишунрин адан гъилик кваз арадал атай “Лацу лиф” тешкилай ва газет вири районда машгьур хьанай. Ам лезги чIалан ва литературадин хазинадиз рехъ ачухзавай улам хьиз тир.

Шаир ва мухбир яз ада аял чIаварилай райондин ва республикадин газетрихъни журналрихъ, радиодихъ галаз алакъа хуьзвай, цIудралди лап хъсан очеркар, репортажар, вишералди шиирар, мисалар, мискIалар, махар кхьена. Хейлин чIалариз манийрин гьаваяр туькIуьрна, вичи лугьуз хьана.

Ам хайи хуьруьн, райондин вафалу дестекрикай сад тир.  Саки къанни цIуд йисуз ада райондин яратмишдай интеллигенциядин “Абулейсан” тешкилатдиз регьбервал гана.

“Лезги газет” патал ада саки хсуси мухбирдин везифаяр тамамарна. Газетдин редакциядин патай адазни кьетIен гьуьрмет ва ихтибар авай.

Гьуьсейн Рамазанан (литературадин тахалус) “КIепIер­бан”, “МискIалар”, “Саф элкъвезва”, “АцIай варз”, “Абулейсан” ктабар несилрив гума.

Адан рикIик хъийидай крар мадни кумай. Амма инсафсуз ажалдиз мажал чидач.

Чна рагьметлудан хизандиз, мукьва-кьилийриз, ярар-дустариз, вири ашавийриз, кьурагьвийриз башсагълугъвал гузва. Гьуьсейн Мегьамедович Рамазанован экуь къамат чи рикIелай садрани алатдач.

“Лезги газет”


Всего просмотров: 192

Читайте также: