Шад гьалара вахкана

Дагъустанда авай къенепатан крарин министерстводин пресс-къуллугъди “Лезги газетдиз” хабар гайивал, и мукьвара МВД-дин министр, полициядин генерал-лейтенант Абдулрашид Мегьамедова къуллугъдин везифайрив эгечIун патал республикадиз хтанвай 70-дав агакьна жегьилрив Россиядин МВД-дин къурулушдиз талукь вузра кIелунар акьалтIарнавайвилин шагьадатнамаяр шад гьалара вахкана.

Мярекатда министрдин заместитель, полициядин полковник Дмитрий Гутыряди, личный составдихъ галаз кIвалахдай Управленидин начальник Сахават Сахаватова ва жегьилри къуллугъдин везифаяр кьилиз акъудун лазим тир подразделенийрин начальникри иштиракна.

Россиядин МВД-дин кIелунин идарайра 5 йисуз чирвилер ва офицервилин чин къачуна хтанвай жегьилри гила хайи республикада къуллугъ давамарун шад жедай кар я. Асул гьисабдай абур вири кIе­лиз рекье тур районра ва шегьер­ра чпин везифайрив эгечIда.

Жегьил офицеррин тIварцIихъ чими келимаяр министр А.Мегьамедова лагьана.

— Дагъустандин МВД-дихъ ­зур­ба тарих, женгинин баркаллу рехъ ава. Эхиримжи 10 йисуз кьиле фейи жуьреба-жуьре женгера 400-далай виниз чи къуллугъчияр телеф хьана.  Россиядин Фе­дера­циядин гьич са региондани Дагъустан Республи­када кьван РФ-дин Иги­тар (16 кас) авач. Абурун экуь къа­матар чи ри­кIе­­лай алатдач. Эгер са ни ятIани писвал авунвай ксариз вавай куьмек гуз жезватIа, вуна жув инсанриз герек тирди гьисс­заватIа, намуслудаказ жуван хиве авай везифаяр кьилиз акъуд­заватIа, къанун-къайда хуьдай къул­лугъчидин пешеда вирида­лай­ни кьилинди, пешедин виридалайни важиблувал гьа им я, — къейд­на Абдулрашид Мегьа­ме­дова.

Министрди хабар гайивал, республикада къуллугъун патал хтанвай жегьилрин арада къанун -къайда хуьдай органра зегьмет чIуг­ваз­вай ксарин веледарни — бубайрин гелера аваз физвай рухваярни — гзаф ава.

— Россиядин МВД-дин вузра кIелнавайбурун арада полициядин телеф хьайи къуллугъчийрин 3 хвани ава. Им бубайрин кьегьалвилер рухвайри дамаварзава лагьай чIал я, — алава хъувуна ада.

Гуьгъуьнлай Абдулрашид Мегьамедова ва жегьил офицерри кIвалахдин рекьяй везифаяр тамамардайла телеф хьайи къуллугъчийриз МВД-дин дараматдин вилик хкажнавай Мемориалдал цуьквер эцигна.

Рагнеда Рамалданова


Всего просмотров: 49

Читайте также: