Шад гьалара ачухна

И мукьвара Кьурагьрин 1-нумрадин юкьван школадин гьаятда спортдин цIийи объект — къугъвадай  чIур ачухуниз талукьарнавай шад мярекат кьиле фена. Ам ачухай ва кьилени тухвай и школадин директор Гьамид Мисриева райондин кьил Замир Азизоваз, физический культурадин ва спортдин отделдин начальник Рамиз Рамазановаз, Дагъустандай ва Россиядин жуьреба-жуьре регионрай атанвай мугьманризни гаф гана. Школада кIелзавай аялри гьазурнавай художественный жуьреба-жуьре нумрайри кIватI хьанвайбурун гуь­гьуьлар мадни шадарна.

Хуьре спортдин жигьетдай еке метлеб авай объект эцигиз активнидаказ куьмекар гайи ксарив­ школадин дирекцияди чухсагъулдин чарар вахкана. Абурун арада ава: Руслан Бабаев, Ра­дик Се­фералиев, Сейфудин Ярагьмедов, Нари­ман Хсенбабаев, Алим Абдуллаев, Закир Урди­ханов, Ислам Рамазанов ва масабур. Спортдин объект туькIуьрунин ва ишлемишиз вахкунин карда активвал къалурай са шумуд кас — Сейфудин Ярагьмедов, Руслан Бабаев ва Малик Агьмадов — райондин кьилин патай къиметлу пишкешриз лайихлу хьана.

Мярекатдилай гуьгъуьниз 1999-йисан августдиз Кеферпатан Дагъустандин мулкарал вегьей бандитрин кIватIалрин хура уьтквемвилелди акъвазай ва игитвилелди телеф хьайи ОМОН-дин капитан Закир Султанован экуь къаматдиз бахшна, гьар йисуз мини-футболдай теш­кил­завай турнир кьиле тухвана. Ана Кьурагьрин 1 ва 2-нумрайрин, КIирийрин, КьепIир­рин, Ашарин юкьван школайра, гьакIни КIирий­рин юкьван умуми ­образованидин спортшкола-интернатда кIелзавай аялрин командайри ишти­ракна. Къизгъин бягьсерин нетижада Кьурагьрин­ 1-нумрадин юкьван школадин хкянавай команда 1-чкадиз лайихлу хьана. КIирийрин спортшкола-интернатдин ва Ашарин юкьван школадин командайри, талукь тирвал, 2 ва 3-чкаяр кьуна.

Турнирда иштиракай вири командайриз кубокар, грамотаяр ва пулдин пишкешар гана.

Регина  Семедова


Всего просмотров: 52
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире