Серенжемар кьабулзава

23-мартдиз РД-дин Кьил Владимир Васильев  коронавирусдин инфекция гъуниз ва чукIуруниз рехъ тагунин ре­кьяй Мах­сус центрадин кIвалахдихъ галаз танишарна. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.

ИкI, презентация кьиле физвай чIавуз РД-дин Минкомсвяздин  информационный политикадин рекьяй управленидин начальникдин заместитель Эльмира Шейховади суьгьбет авурвал, Центради республикадин вири муниципалитетрин, кар кьилиз акъуддай властдин органрин руководителрихъ галаз гъиле-гъил аваз ала­­къа хуьдай мумкинвал гузва. Ана коронавирусдин инфекция чукIу­нихъ галаз алакъалу яз арадал къвезвай гьалариз талукь делилар санал кIватIда, медиамайданда чукIурзавай хабарар, энгел тавуна, веревирдда.

Гуьгъуьнлай В.Васильева та­лукь тир идарайрин вилик-кьилик квай кса­рин иштираквал аваз совещание тухвана. Лап важиблу месэлаяр гьялунив эгечI­далди региондин руководителди  рес­публика­дин руководстводихъ агьалияр чпин яшариз килигна кьилди-кьилдин дестейриз паюниз талукь делилар авайдакай хабар гана.

“Малум тирвал, коронавирусди яшлу ксариз иллаки гзаф тади гуда. Чи муниципалитетарни гьар са районда  гьихьтин яшарин агьалийрин дестеяр аватIа ва а дестеяр гьикьван чIехибур ятIа, гьа кардин гъавурда аваз хьун герек я. Ида волонтеррин кьадар  ва чахъ авай шейэрин кьадар тайинардай мумкинвал гуда.  Инал фикирда авайди  инфекция чукIунин вилик пад кьадай мумкинвал гузвай медицинадин ва санитариядин  такьатар я”, — къейдна В.Васильева.

“Дагъустандин парламентдихъ галаз меслят авуналди, бюджетда, Дагъустандин агьалийрин вилик акъваздай лап хци месэлаяр гьялун патал чара­суз герек атайтIа, 3 миллиард манатдин кьадарда аваз резерв арадал гъун фикирдиз къачунва”, — алава хъувуна Владимир Васильева.

Вичин нубатдай яз РД-дин Гьукуматдин Председателдин Сад лагьай заместитель Гьажимегьамед Гьуьсейнова хабар гайивал, саламатвал хуьдай  шейэрни къачун патал кьетIен гьаларин рекьяй резервдин фондунай Дагъустандин Кьилин тапшуругъдалди алава яз 20 миллион манатдин такьатар чара авунин барадай тапшуругъ кьилиз акъудзава. Мукьвал тир вахтара къарардин проект къул чIу­гун патал гьазур жеда. Гьа и вахтунда къейд авурвал, республикада саламатвал хуьдай шейэр акъуддай чIавуз абурухъ хъсан ери хьунилай гъейри, къиметарни тIем акакьдайбур хьун фикирда кьада.

Совещанидал игьтияж авайбурув,  яш­лу ксарив ва мадни чIехи яшара авай ксарив волонтеррин куьмекдалди суьрсетар агакьунин, коронавирусдин инфекция чу­кIунин вилик пад кьадай “тадиз хабар гу­дай” линиядин гзаф ка­налрин нумра кардик кутунин месэлаярни веревирдна. Министерствойрин ва ведомствойрин руководителриз талукь тир тапшуругъар гана.

Дагъустандин Кьили министерствойрал ва ведомствойрал совещанидал раиж авур теклифар  гъиле-гъил аваз веревирд авун ва абур кьилиз акъудунин къулай жуь­­­рейрикай хабардар авун тапшурмишна­­.

Эхирдай Владимир Васильева ихьтин Центр республикадин гьар са муниципалитетда тешкилун лазим тирдан гьакъиндай малумарна.

* * *

18-мартдилай инихъ Дагъустандиз къе­­цепатан уьлквейрай тахминан  1700 кас хтана. Гьукумдин муниципальный органра ва ОВД-ра абурун сиягьар авазва. Асул ве­зифа хтанвай а ксар амай агьалийривай вах­ту­нал­ди чара авун таъминаруникай ибарат я.

“Са ксари чпи чеб маса ксаривай къерех авунин шартIарал амал тавуни масадбур хаталувилик кутунал гъизва”, — къейдна цIийи коронавирусдин инфекция чукIуниз аксивалдай оперативный штабдин заседанидин сергьятра аваз рахай РД-дин Гьукуматдин Председателдин Сад лагьай заместитель Анатолий Къари­бова. Ада муниципальный тешкилатрин кьилериз къецепатан уьлквейрай хтай гьар са касди чеб маса ксаривай къерех хьунин къайдадал амалзаватIа ахтармишуниз эвер гана. Идалайни гъейри, вири муниципалитетра чирвилер гудай, спортдин идараяр, секцияр, цин гьавизар ва кинотеатрар, анриз инсанар ахъай тийидайвал, агалун меслят къалурнава. Алай вахтунда Дагъустанда COVID-19 жуьредин вирус акатунин са дуьшуьшни хьанвач. Гьавиляй кьабулзавай вири серенжемар регионда коронавирусдин инфекция чукIу­нин вилик пад кьуниз талукьбур я.

Совещанидал медицинадин маскайриз талукь месэлани фикир тагана тунач. Абур РФ-дин Минпромторгди централизоватнавай къайдада маса къачунва. Да­гъустандив 318 агъзур маска агакьда.

Идалай гъейри, Избербашдин индустриально-промышленный коллдежди жунадикай медицинадин маскаяр  гьазурдай производство кардик кутунвайдан патахъайни хабардар авуна. Лазимвал хьайитIа, а маскайралди чIехи несилдин агьалияр, яшайишдин работникар ва маса ксар таъминарда. Маскайрихъ саламатвал хуьдай 8 къат ава. И шейэр сифте нубатда агьалияр гзаф кьадарра санал кIватI жезвай чкайра, гьакIни гьар юкъуз гзаф кьадар инсанрихъ галаз алагъ-салагъда гьатзавай пешекаррин арада паюн теклифнава.

«Лезги газет»


Всего просмотров: 96
Подпишитесь на наши каналы:

Читайте также:


Новости партнеров

Яндекс.КартыКарта распространения коронавируса в России и мире